Haring James gikoronahang NBA all-time scoring leader

CEBU, Philippines — Hingpit nang gibuak ni LA Lakers superstar LeBron James ang record ni Kareem Abdul-Jabbar isip NBA all-time leading scorer atol sa ilang duwa duwa batok sa Oklahoma City Thunder kagahapong adlawa didto sa Crypto.com Arena sa California.

Gipapas sa 39-anyos nga si James ang karaan na kaayong marka diin daghan ang nagtoo nga dili na mahitabong mapapas pa.

Miduwa sa ika-20 niyang season sa NBA, gilabyan ni James ang nakolektang 38,387 puntos ni Jabbar human siya mopasud sa iyang itsa sa nahinapos nga bahin sa ikatulong kuwarter.

Giisa dayon ni James ang iyang mga kamot agi'g selebrasyon sa makabungog nga dungog nga iyang naangkon samtang ang mga fans naghudyaka og maayo sa bag-o niyang record nga 38,388 puntos.

Si Abdul-Jabbar, nga naglingkod sa courtside, usa sa labing una nga mipahalipay ni James samtang temporaryong gihunong ang duwa agi'g pagsaludo sa makasaysayanong panid sa NBA.

"To be able to be in the presence of a legend and great as Kareem it means so much to me," buhagay pa ni James ngadto sa mga nanan-aw sa wala pa gipasalamatan ang iyang pamilya, mga higala ug fans.

"Everybody that's ever been part of this run with me these last 20 years, I just want to say I thank you so much because I wouldn't be me without all your help, all your passion and all your sacrifices to help me get to this point," dugang pa sa four-time NBA champion.

Si James miyukbo sab ni NBA commissioner Adam Silver ug ni anhing David Stern tungod sa paghatag nila kaniya og higayon nga mamahimong kabahin sa usa ka mahinungdanong butang nga iyang gidamgo sa kanunay ug karon iya na gyud nahatagan og katumanan.

Thank you guys so much for allowing me to be a part of something I've always dreamed about, and I would never ever in a million years have dreamt this even better than what it is tonight," dason pa ni James nga klarong naglutaw pa sa panganod ug way kasudlan sa iyang kalipay.