Aguilar nag-una na sa PBA All-Star voting

CEBU, Philippines — Ang big man sa Barangay Ginebra Kings nga si Japeth Aguilar mao na karon ang nag-una sa PBA All-Star voting human sa ikaduhang hugna sa botasyon gikan sa mga fans.

Si Aguilar milayat gikan sa ikatulo ngadto sa numero unong puwesto uban ang 190,273 ka mga boto.

Tungod niini, giposisyon ni Aguilar ang iyang kaugalingon aron mamahimong team captain alang sa giatngan nga PBA All-Star Game nga mahitabo karong Marso 9-12 didto sa Passi, Iloilo.

Ang Ginebra teammate ni Aguilar nga si Scottie Thompson nalansang sa ikaduhang dapit uban ang 186,187 ka boto.

Samtang ang Sugbuanong six-time MVP nga si June Mar Fajardo natagak sa ikatulong luna uban ang 183,903 ka boto.

Nagsunod ni Fajardo mao sila si Jamie Malonzo sa Ginebra (174,112) ug Calvin Abueva sa Magnolia (172,383).

Ang rookie sa Rain or Shine rookie nga si Gian Mamuyac mi-ambak ngadto sa ikaunom nga dapit uban sa 170,359 ka boto. Nindot kaayo kini nga kalamboan alang ni Mamuyac nga wala maapil sa Top 24 sa unang hugna sa botasyon.

Sa iyang comeback season, si James Yap sa Rain or Shine Elasto Painters padayon nga gitamod sa mga fans  nga nagtuboy kaniya sa ikapitong puwesto uban ang 170,313 ka boto.

Naglangkob sa Top 10 mao sila si Christian Standhardinger sa Ginebra (169,718), CJ Perez sa San Miguel Beer (169,036), ug LA Tenorio (166,317) sa Ginebra.

Sa mga coach nga gusto sa fans nga maoy modala sa All-Star teams, sila si Tim Cone sa Ginebra (224,430) ug Yeng Guiao sa Rain or Shine (208,429) maoy manga paborito.

Nakahakot sab hinoon og daghang boto sila si Aldin Ayo sa Converge, Chito Victolero sa Magnolia, ug Norman Black sa Meralco.