Thompson nagmangtas: Miposa'g usa ka dosenang tres sa Warriors

CEBU, Philippines — Si Klay Thompson mituhog og 12 ka tres sa iyang 42 puntos sa dihang gilat-an sa defending champion Golden State Warriors ang Oklahoma City Thunder, 141-114, sa NBA kagahapon didto sa Chase Center sa San Francisco, California.

Tungod sa mainit niyang mga kamot, habit mabuak ni Thompson ang kaugalingon niyang NBA record nga 14 ka 3-pointers nga iyang gikulit niadtong Oktubre 2018.

Sa kinatibuk-an, ang Warriors miposa og 26 ka tres, tulo na lang ang kuwang aron ila untang matabla ang NBA record nga 29 ka 3-pointers sa Milwaukee Bucks niadting 2020.

Dako sab natampo og si Jordan Poole nga mihipos og 21 puntos, 12 ka assists ug upat ka rebounds ingon man si Andrew Wiggins nga mitimbre og 18 puntos alang sa Warriors, nga miduwa nga wala ang superstar nilang si Stepher Curry kay dunay gihambin nga angol.

Didto sa Portland, ang nagkayong Milwaukee Bucks miposte sa ikawalo nilang sagunson nga daog human gitumba ang Trail Blazers,  127-108.

Si Brook Lopez mi-iskor og 27 samtang si Giannis Antetokounmpo midugang og 24 puntos alang sa Bucks.

Didto sa Detroit, si Jayson Tatum mirapido og 34 puntos aron agakon ang Boston Celtics ngadto sa 111-99 nga pagpakaging sa Pistons.

Si Tatum nakakuha og dakong suporta gikan nilang Derrick White, Robert Williams III ug Sam Hauser nga nagumboya'g 53 puntos alang sa Celtics.

Sa laing resulta, ang Cleveland Cavaliers mipayaka sa Washington Wizards, 114-91, alang sa ikatulo nilang sunod-sunod nga daog.

Sila si Jarrett Allen ug Darius Garland mikadlit og 23 puntos matag usa alang sa Cavs samtang si Donovan Mitchell midonar og 21 puntos.