JKV pabiling way pilde; Palfox, Spit On Them mipakurat sa mga kontra

CEBU, Philippines — Gimintinar sa Team JKV ang perpekto ning sinugdanan samtang ang Palfox ug Spit On Them mipakurat sa kanhi way pilde nilang mga karibal pagbalik sa aksiyon sa Hoop Nation Developmental League (HNDL)-Sunday Night Hoops Season 2 nga gipaluyohan sa Sunsport didto sa City Sports Club-Cebu gym.

Si Darrel Ebale miharos og 22 puntos, pito ka rebounds ug upat ka assists sa dihang gilampornas sa JKV ang Seda, 69-50, sa sangka tali sa mga way pildeng koponan.

Tungod niini, gipahugtan sa JKV ang ilang pagkupot sa solong liderato sa South Division uban ang 4-0 record. Ang Seda natagak sa 2-1.

Sa laing bahin, si Jason Lazaro mihipos og 15 puntos, walo ka rebounds ug tulo ka assists sa dihang gilampaso sa Benchwarmer ang Samsung, 71-56, aron pakgangon ang tulo ka sagunson nilang malas.

Sa North Division, si Junde Celocia mi-iskor og 19 puntos uban ang pito ka rebounds ug tulo ka assists sa dihang gipakugangan sa Palfox ang RNK Builders, 59-56, samtang si Michael Lapuz mipupo og 23 puntos, unom ka rebounds, tulo ka assists ug duha ka steals aron pangulohan ang Spit On Them ngadto sa 65-59 nga pagbihag sa Central Bloc-kers.

Ang Palfox nagbitbit na karon og 2-3 nga baraha samtang ang Spit On Them nakadimdim na sa katam-is sa kadaogan human mapakyas sud sa tulo ka sunod-sunod nga pagsuway.

Ang RNK Builders nadakin-as ngadto sa 3-1 samtang ang Central Bloc-kers naminghoy kay naputol na ang upat ka sagunson nilang daog.