Mavs ngadtong Irving: "Welcome to Dallas"

CEBU, Philippines — Gidawat sa Dallas Mavericks ang labing bag-o nilang miyembro nga si NBA All-Star guard Kyrie Irving uban ang tumang kahinagop.

Kini human parehong gikompirma sa Mavs ug Brooklyn Nets ang nahitabong pagbinayloay nila og mga players.

"Welcome to Dallas," tweet pa sa Mavs ngadto ni Irving ug Markieff Morris nga ilang nakuha gikan sa Nets hulip nilang Spencer Dinwiddie, Dorian Finney-Smith ug pipila ka draft picks.

Duha ka adlaw pa lamang milabay sukad si Irving miawhag sa Nets nga i-trade siya, ang Mavs abtik kaayo nga mihimo og lakang aron makuha ang eksplosibong Australyano.

Interesado sab unta ni Irving ang Los Angeles Lakers, Phoenix Suns ug Los Angeles Clippers apan giunhan sila sa Mavs, nga miporma sa usa sa labing hait nga backcourt tandems karon sa NBA nga mao sila si Irving ug Luka Doncic.

Si Irving mi-average og 27.1 puntos, 5.3 assists ug 5.1 rebounds uban sa Nets, samtang si Doncic mipatak og 33.4 puntos matag duwa alang sa Mavs ning season.

Sa kasamtangan, ang Mavs ikaunom sa Western Conference bitbit ang 28-26 record samtang ang Nets ikaupat sa East uban ang 32-20 nga baraha.