WeCare Transport daog na sab
CEBU, Philippines — Gipakaging sa WeCare Transport ang A2E Cargo Logistics, 94-91, alang sa ikaduha nilang sagunson nga daog sa 30-above division sa Amicis Basketball League (ABL) Season 3 didto sa Cansaga gym sa Consolacion, Cebu.
Si Larry Malagar mikadlit og 23 puntos samtang sila si Dittaz Gungob ug Reygie Gabato nagkumboya'g 30 puntos alang sa WeCare.
Nangu sa A2E Cargo Logistics mao si Jonas Cayanong uban ang 23 puntos. Si Antolijao mi-iskor og 21 samtang si John Dave Barrientos mihipos og 19 puntos sa pilderong kawsa.
Sa laing aksiyon, si Jervic Conahap mipabuto og 27 puntos aron pangulohan ang SG5 Madison ngadto sa 104-82 nga paglampaso sa Soo Goood Kan-anan.
Si Conahap nakakuha og dakong suporta gikan nilang Iki Duaso ug Bryle Cabunilas nga mitali og 16 ug 13 puntos.
Sa ubang mga resulta, ang RCBC Gamsi nakaipsot sa Prayboys, 99-97, samtang ang Level Up Poker ni team owner Amy Lorentzen miparot sa YYBC, 90-87.
Si Lemuel Malagar mipaulbo og 38 puntos alang sa RCBC Gamsi samtang si Louie Bio midonar og 21 puntos.
Mikuha sab og atensiyon si Arvin Tolentino nga mipupo og 20 puntos, walo ka rebounds ug walo ka assists alang sa Level Up Poker. Giabagan siya nilang Dennis Batac ug Jerome Valle nga mitimbre og 12 puntos matag usa.
- Latest
