IBP Basketball League Dissenters gikoronahang back-to-back champions

CEBU, Philippines — Ang Dissenters Bad Boys mipatikangkang sa Spartans, 75-71, aron paglugwa nga back-to-back conference champions sa Integrated Bar of the Philippines (IBP) Basketball League 2022 niadtong weekend didto sa Capitol Parish Gym sa may dalan Escario, dakbayan sa Sugbo.

Si Kenneth Kernn Sesante, nga migiya sa University of Cebu (UC) Webmasters ngadto sa ikaduhang dapit sa miaging Cebu Schools Athletic Foundation, Inc. (CESAFI) season, mibubo og nuybe sa iyang 15 puntos sa katapusang kuwarter apil na niini ang nakapadaog niyang 3-pointer hinungdan nga siya maoy gibayaw nga Finals MVP.

Si Luis Fajardo mihipos og 18 puntos samtang si Richard Bauzon midugang og 15 puntos alang sa Dissenters.

Alkansi og 12 puntos sa naghinapos nga bahin sa duwa, ang Dissenters ni playing head coach Al Limalima milusad og bangis kaayong resbak pinaagi nilang Lorenzo "Thirdy" Igot, Ian Santos ug Fajardo hinungdan nga nakatabla sila, 71-71.

Sa kadugayan, nailog sa Dissenters ang labaw, 72-71, sa free throw ni Edwin Estorgio sa nahibilin nga 38 segundos sa duwa. Si Estorgio, ang Finals MVP sa dihang gidominar sa Bad Boys ang First Conference human gilat-an ang Pañeros, 64-45, mitali og siyete sa iyang nuybe puntos gikan sa foul line.

Gisilyohan ni Sesante ang dalaygong pag-eskapo sa Dissenters pinaagi sa paglansang og pamatay nga tres sa pinal nga 3.5 segundos nga mitaop sama sa usa ka hait nga hinagiban sa dughan sa Spartans.

Uban ni Jonas Asis isip assistant coach ug Mark Rosal isip team manager, ang ubang mga sakop sa Dissenters Bad Boys mao sila si Edward Bauzon, Judge Ferdie Riveral, Kent Jongoy, Jay Viagedor, Willem Bagazin, Noel Bragat, Tadz Tumaodos, Angelito Ortiz, Dax Montealegre, Patrick Esmeralda, Ivan Gamallo, Deo Albeos, ug Fillmore Gomos.