Violex Trading sud na's semis sa 1st Zynergia Cup

CEBU, Philippines — Dili na mapugngan, ang Violex Trading mogawas nga no. 1 bisan unsa pa ang resulta  sa ilang katapusang duwa sa elimination round sa 1st Zynergia Cup. Kini human ang Violex midaog na sab, ning higayona batok sa JJS Electrical Supply, 82-72 niadtong Domingo diha sa CEC gym.

Si Jhan Brixter Villarias mao gihapon ang best of the game human iyang gipangulohan ang Violex  (5-1) pinaagi sa iyang 26 puntos, pito ka rebounds ug upat ka assists.

Si Dan Cardenas mitampo’g 21 puntos, samtang ang team manager nga si CJ Cardenas miamot og 10 puntos sa  iyang koponan nga miabante na sa semifinals.

Ang JJS (2-4) ni Joeffrey gipangulohan ni Joshua Banaag nga mikulit og 23 puntos, gisundan ni Eric Sanchez nga adunay 21 puntos.

Sa laing duwa, ang TMV Solid Ground Construction Engineering Building Finishing ni Theresa Villarino naka-eskapo bitbit ang 73-69 nga kadaogan batok sa JMD Automotive ni Gerald Dilao.

Gipangulohan ang daog sa best player niining si Ernie Ygot sa iyang 14 puntos, siyam ka rebounds ug upat ka assists. Si Charlee Lumasag mitimang og 14 puntos, samtang sila si Zachary Bauntad ug Kent Sasiya mitimbre’g 12 puntos matag usa.

Si Lucky Ergiel Mendoza mao sab ang nangu sa JMD nga miposa’g 25 puntos, gisundan ni Noel Alejandro sa iyang 13 puntos ug Jerome Batasan nga adunay 11 puntos. Sa ikatulong duwa, ang Goutsource Solutions International (GSI) yano kaayong miiskor sa ilang ikaupat nga daog human gilubong ang  Donling Aircon and Refrigeration Services, 63-43. Si Deyrrel Rollon mirehistro’g 15 puntos, unom ka rebounds ug tulo ka assists aron mangu sa GSI, ingon man best player of the game.

Sila si Kent Sillar, Berwin Maata ug Geory Apas pareho sab mikulit og double figures sa GSI ni Ivan Llesol. Si Angelo Ponce miposte og 15 puntos, samtang si Roldan Daug milansang og 12 sa Donling ni Romeo Quilaton.

Ang Donling, GSI ug TMV adunay managsamang 4-2 nga baraha ning maong liga nga giorganisar sa Brothers Ballclub.

Sa pikas bahin, ang Jot Trucking midaog pinaagi sa 'forfeiture' batok Domelsky Water Refilling Warriors.