Catmon kampiyon gihapon sa GUV cup

CEBU, Philippines — Ang Catmon milampos pagdepensa sa ilang trono human gipukan ang Mandaue City sud sa upat ka sets, 25-7, 25-20, 17-25, 25-17, sa ilang final match aron paglugwa nga kampiyon sa Season 10 sa One Cebu Island Governor Gwen Garcia Unity Volleyball (GUV) Cup for Women kagahapon didto sa Mandaue City Cultural and Sports Complex.

"I'm very happy because after all the trials we've gone through, we are able to win the championship again. This means a lot for us," matud pa ni coach Vilma Veloso, ang utok sa mabungahong programa sa volleyball sa Catmon nga naghatud sa lungsod og pito ka titulo sa Palarong Pambansa ug lima ka korona sa Milo National Finals

"It's our preparation, teamwork, and discipline that lead us to victory, and of course, the all-out support of our LGU," dugang pa ni Veloso.

Nindot ang gipakitang teamwork sa Catmon apan si Casiey Monique Dongallo maoy misidlak nga labing hayag nilang tanan gumikan sa eksplosibo niining salida. Ang bangis niyang mga ataki ug inutok nga mga tirada nakapahilom sa bagang panon sa mga tigpaluyo sa Mandaue gikan sa pagsugod sa aksiyon.

"It's truly an honor that our team won again. We are still champions and it feels good," dason pa sa 17-anyos nga si Dongallo, nga miduwa sab sa dihang gidominar sa Catmon ang miaging edisyon sa tinuig nga torneyo niadtong 2019 sa wala pa kini gibaraw sa pandemiya sud sa duha ka tuig.

Luyo sa pagmangtas ni Dongallo, gilampornas dayon sa Catmon ang Mandaue sa unang set diin sila mibulhot ngadto sa 16-2 nga labaw dayon na ngadto sa pagposte og 25-7 nga demolisyon.

Misuway og bawos ang Mandaue sa ikaduhang set ug gani nakalabaw pa sila duha ka higayon, ang katapusan sa iskor nga 10-9 gumikan kay ang Catmon milusad og 12-2 run aron ilogon ang labaw sa hingpit, 21-12.

Nakasikit ang Mandaue ngadto na lang sa tres puntos 20-23, apan ang Catmon abtik nga milansang og duha ka sunod-sunod nga puntos aron pag-angkon niini og 2-0 nga bentaha.

Lahi na hinoon ang estorya sa ikatulong set diin ang Mandaue wala na molingi pa sukad sayong mi-abante og kuwatro puntos, 7-3.

Igo lamang nakapaduol ang Catmon sa iskor nga 9-11 gumikan kay ang Mandaue milusad og nagkayong 14-8 rally hinungan nga nakabawos na gyud kini sa iskor nga 25-17.

Sa ikaupat nga set, nabalikan sa ilang kalagsik ang Catmon hinungdan nga sila maoy mikadlit sa nag-unang tulo ka puntos.

Igo lamang nakatabla ang Mandaue, 7-7, gumikan kay ang Catmon miratsada na sab, 10-3, aron pag-abante niini og siyete puntos, 17-10.

Ang Mandaue nakasikit sa katapusang higayon, 15-19, gumikan kay ang Catmon miharos og lima ka sagunson nga puntos sa wala pa gituldokan ni Dongallo ang naglagiting nilang kalamposan.