Pooc Inter-Collegiate caging kasado na

CEBU, Philippines — Andam na ang tanan alang sa labing unang Barangay Pooc, Talisay City Inter-Collegiate Basketball Tournament nga gikatakdang sugdan karong Pebrero 2.

Lima ka teams nga gipangulohan sa reigning Cebu Schools Athletic Foundation, Inc. (CESAFI) champion University of the Visayas (UV) Green Lancers ug runner-up University of Cebu (UC) Webmasters ang mopakita'g aksiyon sa lima ka adlaw nga torneyo nga gituyo aron pagdugang og lamas sa tinuig nga pista sa Pooc agi'g pagtamod sa minahal nilang  patron nga si Senyor San Pedro.  

Mokumbati sab ang University of Southern Philippines Foundation (USPF) Panthers, Cebu Institute of Technology-University (CIT-U) Wildcats, ug Southwestern University (SWU)-Phinma Cobras.

Moduwa sila ubos sa single round robin format. Ang top 2 teams maoy mag-abot sa tinagakay nga kampiyonato samtang ang No.3 ug No.4 magbugno alang sa ikatulong dapit.

Ang makampiyon mobulsa og P50,000 samtang ang mopahiluna sa ikaduha ngadto sa ikaupat nga puwesto makadawat og P30,000, P20,000, ug P10,000.