Bacolod Tay Tung, Don Bosco-Dumaguete gimasaker ang mga kontra
CEBU, Philippines — Gipangdemolis sa Bacolod Tay Tung High School ug Royal Star Trading-Don Bosco Dumaguete ang ilang mga karibal pagsugod sa SM-NBTC Visayas Qualifying Tournament kagahapon didto sa Cebu City Sports Institute sa Barangay Sawang Calero.
Sila si Johanan Raymond Castiller ug Shannon Gray Sealey mirehistro og double-double sa dihang gikuso-kuso sa Tay Tung ang nagkagidlay nga Hardword Baller-Crusader sa Bohol, 106-30.
Si Castiller mitagak og 25 puntos ug 11 ka rebounds samtang si Sealey mitali og 12 puntos, 11 ka rebounds ug duha ka assists alang sa Tay Tung, nga way kaluoy nga mikulata sa Hardwood Baller gikan sa sinugdanan dayon na ngadto sa 76 puntos nga masaker.
Sa laing bahin, si Matthew James Jucom mihipos og 20 puntos, pito ka rebounds, lima ka steals ug duha ka assists samtang si Crescille John Umali midugang og 17 puntos, tulo ka steals ug duha ka assists aron pangulohan ang Royal Star-Don Bosco ngadto sa 99-52 nga paglampaso sa Sacred Heart School-Ateneo de Cebu (SHS-AdC) Team B.
Nagpadayon ang kainit sa Royal Star-Don Bosco hinungdan nga ilang gipasukarap ang Black Shama Consolacion, 75-60, alang sa ikaduha nilang sagunson nga daog.
Sa laing resulta, si John Lorenz Rejas mipupo og 14 puntos, upat ka rebounds ug tulo ka steals samtang si Sandro Ytac mitimbre og 11 puntos, pito ka rebounds ug tulo ka assists sa dihang ang Bentranco Bengals Bohol nakaipsot sa OCCCI-Western Leyte College (WLC) sa Ormoc City, 64-62.
- Latest
