Violex Trading nag-una na sa 1st Zynergia Cup

CEBU, Philippines — Nailog sa Violex Trading ang unang dapit sa standing human midaog batok sa Donling Aircon and Refrigeration Services, 76-70 sa 1st Zynergia Cup niadtong Domingo diha sa CEC gym.

Gawas mipalagpot sa puwesto, ang Violex ni CJ Cardenas mao sab ang nakabuling sa limpiyong rekord sa Donling ni Romeo Quilaton.

Ang duha ka teams pulos adunay 2-1 nga baraha, apan ang Violex maoy miangkon sa unang dapit gumikan sa ilang kadaogan sa Donling.

Si Jhan Brixter Villarias, kinsa miposa og 18 puntos, apil na ang iyang back-to-back baskets  nga naghatag sa Violex og 74-70 nga bentaha sa katapusang 45 segundos sa fourth quarter ang nangu sa kadaogan. Si VM Cempron miantog sab og 18 puntos, hinuon si Villarias ang napiling best player gumikan sa iyang pito ka rebounds ug lima ka assists, samtang si CJ Cardenas miamot og 11 puntos sa Violex nga nibangon gikan sa 20-42 nga pagkalubong sa halftime.

Tulo sab ka Donling players ang miiskor og double figures pinangulohan ni Angelo Ponce nga miposa’g 16 puntos, gisundan ni James Carl Lomuya nga adunay 14 puntos ug Onin Secret sa iyang 13 puntos.

Sa laing duwa, ang JMD Automotive nilansang sa ilang ikaduhang daog pinaagi sa paglubong sa JJS Electrical Supply, 89-75.

Si Alain Tarona maoy nangu sa upat ka players nga miiskor og double figures sa JMD pinaagi sa iyang 19 puntos uban ang siyam ka rebounds ug lima ka assists  nga igo na kaayo alang kaniya aron tahuron isip best player.

Si Lucky Virgiel Mendoza miamot og 14 puntos, samtang sila si Jomarie Batasan ug Victor Dungog nagtampohay og 12 puntos sa team ni Gerald Dilao.

Ang JJS ni Joeffrey Banaag gipangulohan ni Joshua Banaag pinaagi sa iyang 16 puntos, gisundan ni Jerome Pagambunan nga adunay 11 puntos.

Midaog sab ang TMV Solid Ground Construction Engineering Building Finishing pinaagi sa forfeiture batok sa Domelsky Water Refilling Warriors.