Adebayo gi-agak ang Heat batok Celtics

CEBU, Philippines — Si Bam Adebayo mipabuhagay og 30 puntos aron ituboy ang Miami Heat ngadto sa 98-95 nga pagpakaging sa Boston Celtics sa NBA kagahapon didto sa Miami-Dade Arena sa Florida.

Ang Heat nabiyaan og 10 puntos, 77-87, sa pinal nga otso minutos sa aksiyon apan si Haywood Highsmith miposa og duha ka sagunson nga tres hinungdan nga nakasikit sila ngadto na lamang sa kuwarto puntos.

Dinhi na misalida si Adebayo nga mirapido og unom ka sunod-sunod nga puntos aron pagpalabaw sa Heat sa hingpit.

Si Highsmith mitapos uban ang 15 puntos samtang sila si Max Strus ug Victor Oladipo nagkumboya'g 25 puntos alang sa Heat, nga ikaunom karong sa Eastern Conference bitbit ang 27-22 nga baraha.

Si Jayson Tatum mitali og 31 puntos samtang si Derrick White midugang og 23 puntos sa pilderong Celtics.

Sa laing duwa, si Nikola Jokic nagparamdam dayon sa iyang pagbalik gikan sa injury human gi-aswat ang Denver Nuggets ngadto sa kulbahinam nga daog batok sa New Orleans Pelicans, 99-98.

Ang reigning two-time MVP mipasud sa iyang jump shot sa nahibilin nga 16.9 segundos nga maoy nagsilyo sa makutas nilang pagpiog sa Pelicans

Didto sa Madison Square Garden, si Julius Randle mipabuto og 36 puntos aron tabangan ang New York Knicks nga pakagingon ang Cleveland Cavaliers, 105-103.

Sila si Donovan Mitchell ug Jarrett Allen parehong mihipos og 24 puntos apan nakawang ang ilang paningkamot sa habig sa Cavs.