Warriors giugbok ang Rockets
CEBU, Philippines — Si Andrew Wiggins mipabuhagay og season-high 36 puntos sa dihang giugbok sa defending champion Golden State Warriors ang Houston Rockets, 120-101, sa NBA kagahapon didto sa Chase Center sa San Francisco, California.
Bangis kaayo si Wiggins nga milansang og career-high nga walo ka 3-pointers, lima niini iyang giposa sa ikatulong kuwarter diin siya mikadlit og 17 puntos.
Si Stephen Curry mibomba sab og walo ka tres sa iyang 30 puntos samtang si Jordan Poole midugang og 21 puntos alang sa Warriors nga miposte sa ika-10 nilang sagunson nga daog didto sa ilang korte.
Nangu sa nahagsa nga Rockets mao si Kevin Porter Jr. uban ang 20 puntos.
Sa laing aksiyon, sila si Luka Doncic ug Tim Hardaway, Jr. nagmangtas sa ikatulong kuwarter aron ituboy ang Dallas Mavericks ngadto sa 121-100 nga pagpakaging sa New York Knicks didto sa Madison Square Garden.
Si Doncic mi-iskor og 30 samtang si Hardaway mipaulbo og 28 puntos. Nagkumbinar sila 36 puntos sa ikatulong kuwarter diin gilampaso sa Mavs ang Knicks, 41-15, aron kontrolahon ang duwa.
Didto sa Chartlotte, ang Milwaukee Bucks mipayaka sa Hornets, 105-96, bisan og wala ang tulo nila ka mga bitoon nga sila si si Giannis Antetokounmpo, Jrue Holiday ug Khris Middleton.
Si Bobby Portis maoy milugwa nga bida sa Bucks bitbit ang 20 puntos. Giabagan siya nilang Jordan Nwora, Brook Lopez ug Jevon Carter nga nagkumboya'g 45 puntos.
Sa ubang mga resulta, si Shai Gilgeous-Alexander mipabuhagay og 33 puntos sa dihang gipahilom sa Oklahoma City Thunder ang Minnesota Timberwolves, 135-128, samgtang si Domantas Sabonis mitali og 24 puntos sa dihang gikastigo sa Sacramento Kings ang LA Clippers, 123-96. (BANATNEWS)
- Latest