Deadline sa Cebu Marathon registration karong adlawa
CEBU, Philippines — Kadtong gusto mosalmot sa 2023 Cebu Marathon gihatagan hangtud kutob lamang karong adlawa, Nobiembre 30, aron magparehistro. Kini gumikan kay ang mga organizers nakadesidir nga dili na lugwayan pa ang rehistrasyon.
Sa pagka karon, miabot na ngadto sa 7,273 ka runners ang kompirmadong moapil sa giatngan nga lumba karong Enero 8 diin ang Cebu-Cordova Expressway (CCLEX). maoy primerong rota.
Dul-an sa 2,000 ka mga entrante ang mopakita'g aksiyon sa full marathon.
Ang 21K category mao ang dunay labing daghan nga mga partisipante nga mipatak sa 3,329. Ang 10K dunay 1,517 ug ang 5K dunay 509.
Sagad sa mga nagparehistro mosalmot sa 21K ug 42K gumikan kay gusto nilang masinati unsay paminaw nga modagan agi sa makasaysayanong CCLEX.
“We met with the CCLEX top officials last week and are excited to have the runners climb the tallest and longest bridge of the country,” matud pa ni Cebu City Sports Commission (CCSC) chairman John Pages nga usa sa mga nagorganisa sa maong kalihukan.
Kadtong buot moapas sa katapusang adlaw sa rehistrasyon mahimong mobisita sa https://www.cebumarathon.com.ph/
Ang entry fee nagkantidad og P2,400 sa 42K, P2,200 sa 21K, ug P990 sa 5K ug 10K.
- Latest
