IBP basketball: Revengers giyatakan ang Vipers
CEBU, Philippines — Gipanitan sa Revengers ang Aniceta Vipers, 60-44, aron pag-angkon og bahin sa liderato Integrated Bar of the Philippines (IBP) Basketball League 2022 Second Conference didto sa Capitol Parish Gym sa may dalan Escario Street dakbayan sa Sugbo.
Si Dean Padoga mikadlit og 15 puntos samtang si Ephraim Bautista midugang og 10 puntos alang sa Revengers, nga wala na molingi pa sukad mibulhot ngadto sa 18 puntos nga labaw sa halftime, 34-16, aron makigduyog sa Spartans sa kinatas-ang bahin sa liderato bitbit ang managsamang 5-1 win-loss records.
Samtang ang Vipers nahagsa sa 1-5, usa ka duwa lamang ang gintang sa wa pay daog nga YLAC (0-6).
Sa laing duwa, gipiog sa Defenders ang Bad Boys Dissenters, 60-56.
Ang Defenders miposte og 31-25 nga bentaha human sa unang tunga ug madasigon kini nilang giprotekhana hangtud sa naghinapos nga bahin sa duwa aron pagkab-ot og kuwatro puntos nga kadaogan.
Sila si Kalvin “Babyface” Lianza ug Van Ligutan mirapido og 18 puntos matag usa alang sa Defenders nga nagtabla na karon ug ang Dissenters ug Pañeros bitbit ang parehong 4-2 nga baraha.
Si Edwin Estorgio mihipos og 19 puntos, si Kent Francesco Jongoy mi-iskor og 10, samtang ang managsoong Richard ug Edward Bauzon nagkumboya'g 20 puntos apan nakawang ang ilang paningkamot sa Dissenters.
- Latest
