Celtics dali nga namawi, gipayaka ang Mavericks

CEBU, Philippines — Dali nga namawi ang Boston Celtics human maputol ang siyam ka sagunson nilang daog.

Ug gipahimungtan nila sa ilang kayugot ang Dallas Mavericks.

Si Jayson Tatum mi-iskor og 37 puntos ug milangkat og 13 ka rebounds sa dihang gipaluhod sa Celtics ang bisitang Mavericks, 125-112, bisan pa man mipabuto og 42 puntos ang bitoon sa Dallas nga si Doncic.

Nakabangon dayon ang Celtics duha ka adlaw sukad sila gipabugnaw sa Chicago Bulls.

Gawas nga milansang sa ikapito nilang daog sud sa walo ka duwa didto sa ilang korte, giinat sab sa Celtics ang labing nindot nga record ning NBA season ngadto sa 14-4.

Wala na molingi pa ang Celtics sukad miposte og 21 puntos sa halftime, 70-49.

Ang Mavs nakasikit ngadto sa nuybe puntos, 114-105, sa nahibilin nga 3:43 sa duwa apan wala na makaugpo pa human gipabuthan og 10-2 rally sa Celtics.

Sa laing aksiyon, si Trae Young mipabuhagay og 35 puntos sa dihang gipakgang sa Atlanta Hawks ang pito ka sagunson nga daog sa Sacramento Kings, 115-106.

Samtang si Donovan Mitchell mipatuasik og 34 puntos sa dihang gibugha sa Cleveland Cavaliers ang Portland Trail Blazers, 114-96, alang sa ikaupat nilang sunod-sunod nga daog.

Mikuha sab og atensiyon si DeMar DeRozan uban ang 26 putos ug walo ka assists sa dihang gisungag sa Chicago Bulls ang Milwaukee Bucks, 118-113.

Natagak ang Bucks ngadto sa 12-5 bisan pa man nakakuha og 36 puntos, 11 ka rebounds ug pito ka assists gikan ni Giannis Antetokounmpo.

Sa ubang mga resulta, sila si Karl-Anthony Towns nagkumbinar og 44 puntos ug 27 ka rebounds sa dihang gipaak sa Minnesota Timberwolves ang Indiana Pacers, 115-101, si Zion Williamson mipabuhagay og 32 putos ug 11 ka rebounds aron ituboy ang New Orleans Pelicans ngadto sa 129-110 nga pagpakaging sa San Antonio Spurs, samtang sila si Kyle Lowry ug Caleb Martin nagkumboya'g 52 putnos sa dihang gipaksit sa Miami Heat ang Washington Wizards, 113-105.

Wala sab magpabitin ang Brooklyn Nets nga mipatikangkang sa Toronto Raptors, 112-98, luyo sa pagpangu ni Kyrie Irving nga mipatuasik og 29 puntos.