S.I.V unang kampiyon sa Hoop Nation

CEBU, Philippines — Ang S.I.V ballers mikulit sa ilang mga pangan sa bato isip labing unang kampiyon sa Hoop Nation. Kini human gi-sweep sa S.I.V ang Trojan Warriors, 82-74, sa ilang best-of-three finals aron langkaton ang makasaysayanong titulo sa Hoop Nation-Arlon Cup Season 1 niadtong Dominggo didto sa City Sports Club-Cebu gym.

Si Jezreel Padilla nagmangtas uban ang dalaygong double-double nga salida hinungdan nga sa pagbayaw niining Finals MVP.

Si Padilla mibomba og 31 puntos ug 16 ka rebounds nga iyang gipalamanan og duha ka steals ug usa ka block. Nakakuha siya og igong suporta gikan ni JP Yu nga miposa og lima ka tres sa iyang 17 puntos.

Dako sab og natampo si Jake Caballero sa S.I.V uban ang 14 puntos, siyam ka rebounds ug tulo ka assists ingon man si Ian Sulit nga mihipos og 10 puntos.

Si John Paul Banono maoy nangu sa Trojan Warriors bitbit ang 26 puntos, lima ka rebounds ug usa ka steal. Sila si Dan Javellana ug Jeff Montemayor nagkumboya'g 24 puntos sa pilderong kawsa.