Team Riga sa Latvia kampiyon sa FIBA 3x3 WT Cebu Masters
CEBU, Philippines — Ang Riga sa Latvia nakalingkawas batok sa world No.3 Antwerp sa Belgium, 21-19, sa kulbahinam kaayo nilang kampiyonato aron langkaton ang korona sa Chooks-to-Go FIBA 3x3 World Tour Cebu Masters 2022 niadtong Dominggo sa gabii didto sa SM Seaside City.
Si Nauris Miezis maoy mi-iskor sa katapusang siyete puntos sa Riga apil na niini ang krusyal niyang free-throw sa pinal nga 4.8 segundos nga maoy nagsilyo sa makapaisa'g balahibo nga kalamposan sa mga Latvians.
Sa kinatibuk-an, ang 2020 World Tour Most Valuable Player mikadlit og 10 puntos uban ang tulo ka rebounds hinungdan nga gibayaw kining MVP sa torneyo.
"I think I'm born for this moment," matud pa ni Miezis kabahin sa iyang pagkamabayanihon nga naghatud kanila og $40,000 nga ganti.
Si Karlis Lasmanis miamot og sayes puntos samtang sila si Edgars Krumins ug Agnus Cavars nagkumboya'g singko puntos alang sa Riga nga misakmit sa ikaduha nilang World Tour title ning season human gidominar ang Montreal Masters didto sa Canada niadtong Septiembre.
"That was a tough game -- always against Antwerp," dugang pa ni Miezis. "Last minute, we took our game in our hands. I'm happy that we won."
Si Thibaut Vervoort, nga sayo pa nanghawod sa Shootout Contest, maoy nangu sa pilderong Antwerp bitbit ang siyete puntos ug upat ka rebounds.
- Latest