FIBA 3X3 World Tour Cebu Masters dobleng kasakit sa  chooks Philippine teams

CEBU, Philippines — Dobleng kasakit ang nahiaguman sa Team Philippines gumikan kay ang Cebu ug Manila Chooks! parehong nangasugamak sa ilang kampanya sa 2022 Chooks-to-Go FIBA 3x3 World Tour Cebu Masters niadtong weekend didto sa SM City Seaside.

Nindot unta ang sinugdanan sa Manila Chooks! gumikan kay ila dayong gipayaka ang Ludhiana sa Indiana, 21-17.

Apan wala na sila maka-abante pa sa qualifying draw human nakatilaw og 21-16 nga kaparotan sa mga kamot sa Doha QSC sa Qatar.

Usa kadto ka klase sa panamilit nga wala gipanghinaut ni playing coach Chico Lanete.

Ang 43-anyos nga si Lanete moretiro na sa basketball human sa katapusang duwa sa mabulokon niyang karera nga milanat og 15 ka tuig.

Sama sa ilang Manila nga mga katropa, ang Cebu Chooks! nakahiagum og susamang kapalaran.

Gipangulohan sa mga garbo sa Sugbo nga sila si Mac Tallo ug Zach Huang, ang Cebu Chooks! nahagba batok sa world no.3 Antwerp sa Belgium, 16-11, sa una nilang duwa.

Ang Cebu Chooks! hingpit nga nanamalit sa malisud nga kompetisyon human sila gikastigo sa Omaha 3Ball sa Amerika, 21-14.

Tataw nga makabuak sa dughan ang kapakyasan nga mihampak sa Chooks Phl teams gumikan kay way bisan usa kanila ang nakalahutay ngadto sa sunod nga hugna, sukwahi kaayo sa Manila Masters niadtong Mayo diin ang Cebu ug Manila parehong naka-abot sa knockout stage.