Tayud, Pulpogan milukat og tickets sa final
CEBU, Philippines — Ang Tayud ug Pulpogan mipadala sa ilang mga teams ngadto sa kampiyonato sa tagsa-tagsa nila ka dibisyon sa 11th Mayor Teresa "Nene" P. Alegado Cup Fiesta Basketball League didto sa Consolacion, Cebu.
Si Cisco Cuyos mitali og 23 puntos samtang si Miko Mata midugang og 15 puntos sa dihang gilampaso sa Tayud ang Jugan, 103-79, aron pagmartsa ngadto sa midget category A final.
Sikit kaayo ang duwa sa first half apan ang Tayud nag-wild sa pinal nga duha ka kuwarter diin ilang gilat-an ang Jugan, 58-37, aron pagposte og 24 puntos nga demolisyon.
Si Lee Michael Dahil maoy nangu sa Jugan uban ang 28 puntos samtang sila si Xyriel Pilapil ug Shan Sarno nagkumboya'g 27 puntos sa pilderong kawsa.
Sa laing bahin, ang Pulpogan mipayaka sa Jugan, 95-87, aron pagtikang sa senior category A final nga usa ka best-of-three series.
Si Russel Moneva ang bida sa Pulpogan bitbit ang 19 puntos. Gipaluyohan siya nilang Harold Javier ug Rexon Moneva nga mipupo og 18 puntos matag usa.
Si Venhur Villamor mitagak og 22 puntos samtang sila si Alamer Ibale ug Japet Naingue parehong mihipos og 19 puntos alang sa natikangkang nga Jugan.
- Latest