FIBA 3X3 World Tour pambato sa Pilipinas moasdang na sa gubat

Misaad nga depensaan ang ilang korte batok sa mga langyaw

CEBU, Philippines — Miabot na ang takna sa paghukom alang sa mga pambato sa Pilipinas gumikan kay mokumbati na sila sa giatngan nga Chooks-to-Go Pilipinas FIBA 3x3 World Tour Cebu Masters sugod karong adlawa didto sa SM Seaside City.

Napuno sa pagsalig, ang Cebu ug Manila Chooks parehong misaad nga molusad sila og usa ka dakong gubat ug buhaton nila tanan kutob sa ilang mahimo aron madepensaan ang ilang korte batok sa sa labing lig-on nga puwersa nga ilang ikabangga sa natad sa 3x3 basketball. 

Ang Cebu Chooks, ang labing taas og rating nga Phl team nga No.26 karon sa FIBA 3x3 rankings, magsandig sa mainit suporta sa mga home fans gumikan kay duha sa ilang magduduwa nga sila si Mac Tallo ug Zach Huang mga idolo ug garbo man sa mga Sugbuanon.   

Si Tallo, nga usa sa labing eksplosibong scorers ug makalingaw nga players sa internasyonal nga eksena sa 3x3, gipaabot nga maoy mangu sa Cebu Chooks nga gutom og makasaysayanong kalamposan sa kalibutanhong bantawan. Mohatag og dugang kusog sa ilang puwersa mao sila si Mike Harry Nzeusseu ug Brandon Ramirez.

"We will come out there fighting to the best of our ability and show to the world what the Filipinos are made of in 3x3 play," matud pa ni Tallo. "This is for the Cebuanos. I just I hope that we will be able to deliver a performance that will make them proud and happy of us."

Malisud hinoon nga tahas ang sagubangon sa Cebu ug Manila Chooks kay duna pay 12 ka laing teams gikan sa 10 ka nasud ang nalaraw nga langkaton ang tropeyo sa kampiyonato nga nagtangag sab og $10,000 nga ganti. Nag-atang sa ilang dalan sa unahan ang world No.4 Riga sa Latvia nga maoy nakadaog sa gold medal sa Tokyo Olympics ug maoy 2020 FIBA 3x3 World Tour champions.

Hapit hinoon mabihag sa Cebu Chooks ang Riga atol sa Dubai Expo Super Quest niadtong Marso. Sa susamang torneyo, gipukan nila ang world No.25 Chicago sa wala pa sila miyukbo ngadto sa world No.3 Belgium nga mopakita sab og aksiyon sa Cebu Masters.

Sa laing bahin, ang Manila Chooks maglaum sila sa abilidad nilang Chico Lanete, Henry Iloka, Dennis Santos, ug laing garbo sa Sugbo nga si Dave Ando nga sa edad nga 22 anyos maoy labing bata nga Pinoy sa kompestiyon. Gikinahanglan nga mopatigbabaw sila batok sa Ludhiana sa India ug Doha sa Qatar aron mo-abante sa main draw.