Catmon leg sa Northball Basketball Tour kasado na ugma

CEBU, Philippines — Ang mga basketball fans didto sa munisipalidad Catmon, amihanang bahin sa Sugbo angay mangandam sa ilang kaugalingon alang sa usa ka kulbahinam ug makalingaw nga aksiyon gumikan kay ang Northball Basketball Tour molabyog didto sa ilang lungsod karong Sabado, Oktubre 1.

Sugdan ang kumbati sa alas-8 sa gabii didto sa Pedro J. Monsanto United Center.

Magsangka mao ang dekalibreng Northball team batok sa Fighter Fifty nga gipangulohan ni ex-PBA star Dondon Hontiveros.

"It will be a great day for basketball fans in the municipality of Catmon as current PBA players and PBA legends will play right before their eyes," paambit pa ni Northball founder Arjie Lacno.

Ang mga kanhi bitoon sa PBA nga sila si Peter June Simon, Jayjay Helterbrand ug Rico Maierhofer maoy mangu sa koponan sa Northball.

Ilang makauban sila si Pilipinas Super League Finals MVP Emman Calo, commercial veteran Steve Castro, Tosh Sesay sa University of Cebu (UC), ex-University of the Visayas (UV) Green Lancer Poypoy Actub, ug Wesley Malazarte sa PSL U21 Visayas champion Consolacion Sarok Weavers nga giduma sa iyang amahan nga si Marc Malazarte.

Harongon sa Northball ang katahaan sab nga linyada sa Fighter Fifty ni Hontiveros, JR Quiñahan ug Marion Magat sa NLEX Road Warriors, ug Calvin Oftana sa TNT Tropang Giga.

Magsilbe nilang back-up ang duha ka kanhi MVP sa Cebu Schools Athletic Foundation, Inc. (CESAFI) nga sila si Jaybie Mantilla sa University of San Jose-Recoletos (USJ-R) Jaguars ug Shaq Imperial sa Southwestern University (SWU)-Phinma Cobras.

Ang mga tickets sa maong event nga gipaluyohan sa 032 Kicks by Miller inabagan ni Catmon Mayor Avis Ginoo-Monleon ug konsehal George Molina nagkantidad og P150 sa general admission ug P350 sa courtside. Alang sa dugang detalye, mahimong mobisita sa Northball Facebook page.