UP Cebu bunyagan og kayo
CEBU, Philippines — Ang mga basketbolista sa University of the Philippines (UP) Cebu bunyagan og kayo isip labing bag-ong mga miyembro sa Cebu Schools Athletic Foundation, Inc. (CESAFI) duha ka semana gikan karon.
Una sa tanan, ang UP Cebu high school ballclub mo-debut batok sa City of Bogo Science and Arts Academy (CBSAA) Trailblazers sa pasiunang duwa sa giatngan nga comeback season sa CESAFI karong Oktubre 15 diha sa Cebu Coliseum.
Ang UP Cebu ug CBSAA magsangka sa alas-4 sa hapon, sa dili pa mag-engkuwentro ang University of San Jose-Recoletos (USJ-R) Jaguars ug Cebu Institute of Technology-University (CIT-U) Wildcats sa main game sa alas 5:30 sa hapon.
Ang labing lisud nga hagit sa UP Cebu maabot dayon sa sunod nga adlaw (Dominggo, Oktubre 16) sa dihang banggaon sa ilang collegiate team ang gamhanang University of the Visayas (UV) Green Lancers, nga milangkat og 13 sa 20 ka mga titulo apil na niini ang siyam ka sagunson nga kampiyonato gikan sa pagkahimusgo sa liga niadtong 2000 ngadto sa 2009.
Ang mga Iskos makigtige sa Green Lancers sa alas 5:30 sa hapon, nga maoy main event sa nakalinyang upat ka mga duwa diin ang reigning juniors champion Sacred Heart School-Ateneo de Cebu (SHS-AdC) Magis Eagles magsugod pagdepensa sa ilang korona batok sa USJ-R Baby Jaguars sa ala-1 sa hapon.
Sa tunga-tungang bahin, ang University of San Carlos (USC) Warriors ug ang mga batan-ong niining katropa makigharong batok sa University of Southern Philippines Foundation (USPF) Panthers ug UCLM (University of Cebu Lapu-Lapu and Mandaue).
- Latest
