RW Freight nagpanilap sa makasaysayanong korona
CEBU, Philippines — Gipayaka sa RW Freight ang Truck 'N Trail, 74-68, sa pasiunang duwa sa ilang best-of-three finals series sa labing unang Lycans Basketball League (LBL) season didto sa Cebu Port Authority gym.
Si EJ Conahap maoy nangu sa RW Freight uban ang 23 puntos.
Midugang si Jo Cabahug og 16 puntos samtang sila sila Jerico Cortes ug Phil Mercader nagkumboya'g 21 puntos alang sa mananaog nga kampo.
Si Anchor Igot mitali og 18 puntos, si J-Ton Baclaan mi-iskor og 16 samtang si John Velasco mihipos og 12 puntos apan nakawang ang ilang paningkamot sa habig sa Truck 'N Trail.
Mahimo nang langkaton sa RW Freight ang makasaysayong korona kon ugaling ilang usban og parot ang Truck 'N Trail sa Game 2 karong Sabado, Oktubre 1.
Ang Game 3, kon ugaling gikinahanglan, duwaon human sa All-Star Game unya sa Oktubre 8.
Ang makampiyon mobulsa og P20,000 samtang ang first runner-up mokubra og P10,000. Ang MVP dunay pahalipay nga bag-ong Nike nga sapatos.
- Latest