Asian Orthopedics 2014 naka-iskor og 8-0 sweep
CEBU, Philippines — Ang Asian Orthopedics Batch 2014 mipatikyaob sa SABR Solutions Batch 2018, 79-62, aron pagkumpleto og dalaygong 8-0 sweep sa Division C sa Sacred Heart Ateneo Alumni Basketball Athletic Association (SHAABAA) Season 25 naidtong Dominggo didto sa Magis Eagles Arena sa Barangay Canduman, dakbayan sa Mandaue.
Si Gio Laguyo maoy nangu sa Batch 2014 bitbit ang 19 puntos, lima ka rebounds ug lima sab ka assists. Si Jair Igna mi-iskor og 11, si Popoy Navarro mihipos og 10 puntos, 10 ka rebounds, unom ka assists ug duha ka steals samtang si Lucky Ecarma midugang og 10 puntos, 13 ka rebounds, lima ka assists ug tulo ka steals sa balanse nilang ataki.
Sa laing duwa sa Division C, si Lorenzo Carampatana mitali og 19 puntos samtang si Dave Wilson Yu mipabuhagay og 17 puntos, 18 ka rebounds ug siyam ka assists sa dihang gilupig sa Carampatana Food Corp. Batch 2012 ang Storage Town Batch 2015, 89-80, aron pagpabilin sa ikaduhang dapit uban ang 6-1 nga baraha.
Sa Division A, ang Xchange Forex Batch 2000 milampaso sa GEF Daikin Batch 1998, 79-51, aron inaton ang perpekto nilang record ngadto sa 7-0. Si Serg Al Go Bui miratsada og 29 puntos ug 12 ka rebounds, si Dave Ting midugang og 19 puntos ug unom ka rebounds samtang si Joseph Lo mibugha og 15 puntos, 16 ka rebounds ug pito ka assists sa Batch 2000.
Sa laing bahin, sila si Mark Tam ug Alan Ong nagkumboya og 31 putnos sa dihang gipaksit sa AutoLAB Batch 1999 ang Mandaue Eco Glass Batch 1992, 71-49, samtang sila si Roderick Mangubat ug Mark Sy nagkumbinar og 34 puntos ug 24 ka rebounds aron pangulohan ang Magis Medical Fund Batch 1997 ngadto sa 84-60 nga paglampaso sa Speed Demon Batch 1996. Ang Batch 1999 ug Batch 1997 nagkupot na karon og parehong 5-2 nga baraha.
Sa laing resulta, ang Vivant Corenergy Batch 1994 miposte sa ikaupat nilang daog sud sa unom ka duwa human gilat-an ang Gaisano Capital/San Remigio Beach Club/KJO prints/Badbeat Sportswear Batch 2002, 120-68. Si Jacques Ian Lee maoy bida sa Batch 1994 bitbit ang 28 puntos ug 12 ka rebounds inabagan ni kanhi PBA player Joel Co nga mibubo og triple-double uban ang 19 puntos, 18 ka rebounds, ug 10 assists.
- Latest
