NAC Mr. & Ms. Philippines kasado na sa Oktubre 1
CEBU, Philippines — Ang mga tang-an nga bodybuilders sa nagkadaiyang dapit sa nasud nagpanikad nang mowadwad sa maanindot nga porma ug pagkakulit sa ilang lawas sa umaabot nga 2022 Mr. & Ms. Philippines National Bodybuilding and Bikini Championship nga gikatakda karong Oktubre 1 didto sa Crown Regency Hotel & Towers sa Fuente Osmena, dakbayan sa Sugbo.
Si Sheila Delgado, kapikas ni anhing Dennis Delgado sa Workout Fitness Center nga maoy nag-organisa sa maong event, nagkanayon nga miabot ngadto sa 12 ka mga kategoriya ang kumbatihan sa kapin sa 100 ka mga atleta.
Kini mao ang Master’s 2 & 1, Ms. Bikini, Ms. Figure, Mr. Novice, Physique Short Board Shorts, Physique Tall Board Shorts, Mr. Athletic Short, Mr. Athletic Tall, Men’s Body Short, Medium ug Tall Class.
Si Senador Ronald “Bato” Dela Rosa maoy mohatag sa mga tropeyo sa tanang mga manaog.
Ang kompetisyon, diin ang makasalmot kadto lamang mga imbitado, magsilbeng qualifier alang sa Mr. Universse 2022 nga ipahigayon didto sa Cuxhaven, Germany karong Nobiembre 26.
Duna kini pagtugot gikan sa NAC International nga toa magbase sa Germany luyo sa pagpangu sa presidente niining si Harald Hoyler inabagan sa NAC Philippines ubos sa liderato ni Patrick Tan ug Therese Yupangco.
- Latest
