Dave Ando mipaambit sa dalaygong kaagi

Andam na alang sa FIBA 3x3 World Tour Cebu Masters

CEBU, Philippines — Samtang ang mas sikat niyang mga teammates nga sila si Mac Tallo ug Zachy Huang mikuha og atensiyon, laing Sugbuanong player nga si Arnold Dave Ando ang nanghinaut sa hilom nga mohimo og impresyon sa iyang pagduwa atubangan sa iyang mga katalilungsdod sa labing unang higayon sud sa dul-an usa ka dekada.

Ang 6'7" nga si Ando, nga way lalis usa ka sumusulbong nga bitoon sa Philippine basketball, kabahin sa Manila Chooks team nga mopakita'g aksiyon sa gikahinaman nga 2022 Chooks-to-Go FIBA 3x3 World Tour Cebu Masters nga gikatakda karong Oktubre 1-2 didto sa SM Seaside City.

Dili man tuod motagring ang iyang pangan sa uban apan ang garbo sa Barangay Luyang sa lungsod sa San Remigio amihanang bahin sa Sugbo tataw nga nakahimo na og pangan sa iyang kaugalingon.

Misika gikan sa ubos ubos niyang sinugdanan, si Ando nagsugod pagpakita sa iyang abilidad sa mga inter-barangay nga torneyo sa ilang lungsod.

Didto siya nasigpatan sa higala sa iyang amahan nga mi-awhag kaniya nga mosuway sa iyang suwerti sa mas dakong liga sa siyudad.Iya kining gibuhat.

Human sa malisud nga tryout, si Ando nakasud isip Cebu Eastern College (CEC) Dragons high school varsity sa Cebu Schools Athletic Foundation, Inc. (CESAFI) niadtong 2013. Miduwa siya sa Dragons sud lamang sa usa ka tuig kay gi-recruit man sab dayon siya sa University of San Jose-Recoletos (USJ-R) Baby Jaguars diin siya miwadwad sud sa tulo ka tuig hangtud nga nahuman siya og senior high school.

Nakita ang iyang potensiyal, si Ando gikuha s aUniversity of Santo Tomas (UST) sa UAAP ubos sa paggiya ni coach Aldin Ayo. Mibanat siya sud sa tulo ka seasons uban sa Growling Tigers diin gibaid niya ang iyang abilidad isip big man nga hait og outside shooting.

Niadtong Hulyo, si Ando nakahukom nga dili na tiwason pa ang nahibilin niyang mga tuig sa UST aron motapon sa estalisadong Chooks 3x3 program luyo sa pag-agni ni coach Ayo. Wala magdugay si Ando naganahan ug nalingaw sa istilo sa duwa sa 3x3.

"Na-interesado ko sa 3x3 kay ganahan ko nga naa tay bag-o nga makat-onan," matud pa ni Ando. "Nindot kaayo ang intensity sa duwa sa 3x3. Lisud pero maoy nakanindot kay motaas gyud ang level sa imong duwa ug ma-improve ang imong basketball IQ."

Sa una niyang salida sa 3x3 uban sa Manila Chooks, naka-abot sila sa semifinals sae Chooks-to-Go Pilipinas 3x3 International Standalone Quest didto sa Laguna sa miaging semana.

Karon nga mag-atubang siya og laing hagit, ang 23-anyos nga si Ando gibati og tumang kahinam apan na-presyur sab gamay nga mopakita sa iyang katakos atubangan sa ilang home fans.

"Siyempre excited kaayo ko moduwa before sa akoang mga kababayan. Gusto sab nako i-prove nga worthy nga maapil ani nga team. Maningkamot lang ko ug ihatag ang akong 100 percent best in every game,"pasalig pa ni Ando.

Nagagikan sa usa ka mingaw  ngabarangay sa halayong amihanang lungsod sa Sugbo, taas na gyud og naabtan si Ando. Og duna siya'y tambag alang niadtong gusto mosunod sa iyang mga      tunod.

"Para niadtong mga batan-on gikan sa probinsiya sama nako, paningkamot lang gyud. Ayaw kawala og paglaum sa inyohang mga pangandoy ug apili og ampo pirme sa Ginoo kay diha ta niya nagkuha og kusog. Ayaw i-doubt inyo kaugalingon kon gusto mo molampus sa kinabuhi," panapos pa ni Ando.