Asian Orthopedics, Cebu Landmasters padayong miratsada

CEBU, Philippines — Ang naghagurong nga Asian Orthopedics 2014 ug Cebu Landmasters 2003 nakasustinir sa mainit nilang ratsada sa Sacred Heart Ateneo Alumni Basketball Athletic Association (SHAABAA) Season 25 niadtong Dominggo didto sa Magis Eagles Arena sa Sacred Heart School-Ateneo de Cebu (SHS-AdC) sa Barangay Canduman, dakbayan sa Mandaue.

Si Lucky Ecarma mipabuhagay og 21 puntos ug 17 ka rebounds sa dihang ang Asian Orthopedics nakaipsot sa Storage Town 2015, 62-60, sa kulbahinam kaayong sangka tali sa mga way pildeng koponan.   

Miamot si Arvid Jason Ong og 15 puntos, duha ka rebounds ug duha ka assists samtang si Jair Igna mitampo og 12 puntos ug upat ka rebounds sa dihang gipahugtan sa Batch 2014 ang ilang pagkupot sa solong liderato sa Division C bitbit ang perpektong 5-0 record. Mihipos si Felixberto Jaboneta og 17 puntos, 12 ka rebounds ug upat ka assists samtang si Chaz Cokaliong mitali og 14 puntos apan way nahimo kay ang Batch 2015 nakatilaw sa una nilang pilde sud sa tulo ka duwa.

Sa laing sangka sa Division C, si Mitch Almodal mibubo og 17 puntos, unom ka rebounds, upat ka assists ug duha ka assists samtang si Zeke Swayze Himaya ug Romeo Jabalon parehong mi-iskor og 14 sa dihang gilampaso sa RDAK Powersports 2020 ang Batch 2019, 97-62, alang sa una nilang daog.

Sa Division B, ang Cebu Landmasters misutoy ngadto sa ikaupat nilang sagunson nga daog human gilampornas ang Batch 2005, 94-61.

Si Wilmer Rodney Ong mitagak og 22 puntos ug 14 ka rebounds samtang si Daryle Tan mitimbre og 17 puntos ug walo ka rebounds alang sa Batch 2003 nga dominante kaayo ug wala na molingi pa sukad mibulhot sa sayong 27-12 nga labaw.

Sa Division B gihapon, nagmangtas na sab si Leigh Christian Dixon uban ang 27 puntos ug makalisang nga 37 rebounds nga iyang gipalamanan og upat ka assists ug duha ka steals aron pangulohan ang Bad Boys Wingz 2007 ngadto sa 81-62 nga paglampaso sa  Marjaztin Glass Trading & Construction 2008.

Si Aaron John de los Reyes midonar og 17 puntos samtang si Karl de Pio banged mipupo og 15 puntos, 14 kqa rebounds, lima ka assists ug tulo ka steals sa ikaduhang sunod-sunod nga daog sa Batch 2007.