Asian Orthopedics, Storage Town pabiling way pilde

CEBU, Philippines — Ang Asian Orthopedics 2014 ug Storage Town 2015 nagpabiling way pilde sa Division C sa Sacred Heart Ateneo Alumni Basketball Athletic Association (SHAABAA) Season 25 didto sa Magis Eagles Arena sa Sacred Heart School-Ateneo de Cebu (SHS-AdC) sa Barangay Canduman, dakbayan sa Mandaue.

Si Giovanni Laguyo miharos og 20 puntos, tulo ka rebounds, lima ka assists ug duha ka steals sa dihang gilampornas sa Asian Orthopedics 2014 ang Casa Mira 2021, 96-54, aron pahugtan ang ilang pagkupot sa solong liderato bitbit ang perpektong 4-0 record.

Miamot si Lucky Ecarma og 14 puntos, walo ka rebounds ug unom ka assists, si Arvid Jason Ong midugang og 13 puntos samtang si Josemaria Rafael Navarro midonar og 12 puntos ug tulo ka rebounds alang sa Batch 2014.

Si Rey Marcus Fuentes mihipos og 16 puntos ug upat ka rebounds samtang si Walter Franz Yu mitali og 19 puntos alang sa Batch 2021 nga nadakin-as ngadto sa ikatulo nilang sagunson nga pilde.

Sa laing bahin, si Anton Araw-Araw hapit moposte og triple-double uban ang 17 puntos, 10 ka rebounds ug siyam ka assists nga iyang gipalamanan og lima ka steals sa dihang gipakaging sa Storage Town 2015 ang RDAK Powersports 2020, 75-68.

Si Chaz Cokaliong milansang og lima ka 3-pointers sa iyang 17 puntos samtang sila si Steven Co ug Daniel Gillamac nagkumboya'g 24 puntos alang sa ikaduhang sunod-sunod nga daog sa Storage Town.

Si Mitch Ivan Almodal maoy nangu sa Batch 2020 bitbit ang 19 puntos, tulo ka rebounds, duha ka assists ug tulo ka steals samtang si Zeke Swayze Himaya mikolekta og 18 puntos, lima ka rebounds, upat ka assists ug tulo ka steals sa pilderong kawsa.

Sa bugtong aksiyon sa Division B, si Kyle Edwin Valmoria mipabuto og 26 puntos, siyam ka rebounds ug pito ka assists alang sa Starkwood Properties 2009 nga mirehistro sa una nilang daog human gipayaka ang Marjaztin Glass Trading & Construction 2008, 83-70,

Si Niel Benedicto midonar og 18 puntos, pito ka rebounds ug upat ka assists alang sa Batch 2009 nga misanta sa tulo ka duwa nilang malas.

Si Jonathan Edmon Cimafranca mitagak og 24 puntos, lima ka rebounds ug upat ka steals samtang si Ed Bonphyl Macasling miiskor og 16 apan wala silay nahimo kay ang Batch 2008 nahagsa sa ikatulo nilang sagunson nga pilde.