^

Banat Palaro

Abne nakalingkawas sa malisud nga hagit

Emmanuel B. Villaruel - Banat

Gabunilas mi-TKO ni Dadivas sa ikawalong hugna

CEBU, Philippines — Ang pambatong flyweight sa ARQ Stable nga si April Jay "Astroboy" Abne nakalingkawas sa labing lisud nga hagit sa iyang karera human gipilde si Christian "Chiquito" Bacolod pinaagi sa sikit kaayong unanimous decision sa main event sa "Engkwentro 6" sa ARQ Sports Promotions niadtong Dominggo sa gabii didto sa Bonifacio Bacaltos Sports Centrum sa Sibonga, Cebu.

Si Abne, ang Oriental and Pacific Boxing Federation (OPBF) Silver champion nga rated No.30 sa World Boxing Council (WBC), mao kanunay ang nagadepensa gumikan kay si Bacolod mipindot dayon sa ataki gikan sa pagsugod hangtud sa katapusang bahin sa 10 ka hugna nilang kumbati nga gipakpakan og maayo sa mga nanan-aw.

Si Bacolod agresibo kaayo sa sinugdanan ug way kahadlok nga nakighilam-osay og kumo Abne sa unang tunga nga bahin sa ilang engkwentro nga napuno sa aksiyon. Apan si Abne mipakgang sa way puas nga opensiba ni Bacolod gamit ang inutok niyang depensa, hait nga mga jabs ug maanindot nga counter-punches nga sagad nakapahunong ni Bacolod sa giagian niini.

Si Bacolod nakalandig og hagpok nga mga kombinasyon sa ikapito ug ikawalong hugna ug dayon mipatupa og solidong right overhand ngadto sa ulo nga nakapabarag ni Abne sa hilimatyong segundos sa ika-10 ug katapusang hugna.

Nakasugkod hinoon ang 23-anyos nga si Abne ug pabiling nagbarog hangtud nga napupos ang oras. Ang tulo ka mga judges nga sila si Edward Ligas, Arnel Pasion ug Noel Flores mitali og parehong iskor nga 96-94 pabor tanan ni Abne.

"Lig-on sad akong kontra apan mapasalamaton ko niya kay dako kaayo ko og nakuha nga experience atong awaya," matud pa ni Abne human giinat ang iyang record ngadto sa 10-1 uban ang 5KOs. Si Bacolod nakatilaw sa ikaduha pa lamang niining pilde sud sa 16 ka away uban ang 10KOs.

Sa supporting main event, si OPBF Youth light flyweight champion John Paul "Angas ng Cebu" Gabunilas mapakita og igong katakos bisan mi-away nga naglain ang tiyan dayon na ngadto sa pagposte og impresibong kadaogan pinaagi sa TKO sa ikawalong hugna batok ni Ruben Dadivas sa MP Stable ni Pinoy ring legend Manny Pacquiao.   

Kontrolado kaayo ni Gabunilas ang duwa gikan sa pagsugod hangtud nga mipatupa siya og mahait nga suntok sa ulo nga naka-abli og gisi sa ibabaw nga bahin sa walang mata ni Dadivas sa ikaupat nga hugna.

Sukad niadto, mao na kini ang gibiradahan ni Gabunilas gamit ang kalkulado niyang mga tira sa ulo nga nakapasamot sa angol ni Dadivas.

Kay way hunong ang pag-agas sa dugo gikan sa gisi ni Dadivas, giundang ni reperi Rey Caitom ang away sigun sa tambag ni ringside physician Byron Garcia pagpahuman sa ikawalong hugna. Si Gabunilas nagkupot na karon og 8-1 nga baraha samtang si Dadivas natagak sa 8-2 (4KOs).

Sa ubang mga resulta, ang managsoong Rodex ug Bryx Piala pulos mi-TKO nilang Danny Tampipi ug Ponciano Rimandiman samtang sila si Berland Robles, Bryan James Wild ug Ramel Macado, Jr. mipatigabaw pinaagi sa unanimous decision batok nilang Ramil Antaran, Mateo Handig, ug Alvin Camigue.

Si Rodel Wenceslao mipukan ni Ernesto Cagampang pinaagi sa technical decision, si Yerroge Gura mipasurender ni Jeffrey Galero human sa ikaduhang hugna, samtang ang manghud ni Abne nga si Ian Paul nagtabla ug si Charlie Malupangue.

ARQ

Philstar
  • Latest
Latest
Latest
Are you sure you want to log out?
X
Login

Philstar.com is one of the most vibrant, opinionated, discerning communities of readers on cyberspace. With your meaningful insights, help shape the stories that can shape the country. Sign up now!

FORGOT PASSWORD?
SIGN IN
or sign in with