ARQ Builders, Deon Motors gisubha'g daog

CEBU, Philippines — Giablihan sa ARQ Builders ug Deon Motors ang ilang kampanya pinaagi sa usa ka masipang buto sa 1st Mayor Michael L. Rama Basketball Invitational League 2022 niadtong Biyernes sa gabii didto sa Cebu City Sports Institute sa Barangay Sawang Calero.

Sila si Emman Calo ug Rino Berame mipasiugda og bangis nga endgame rally sa dihang gipatikalbong sa ARQ Builders ang Fighter Fifty, 94-86.

Naglabaw lamang og usa ka lugas human sa tulo ka kuwarter, 68-67, sila si Calo ug  Berame nagkumboya'g 19 puntos sa nagkayong 26-19 rally sa pinal nga 10 minutos sa aksiyon aron pagtuboy sa ARQ ngadto sa otso puntos nga kadaogan.

Si Calo miposte og solidong double-double uban ang 20 puntos ug 10 ka rebounds nga iyang gipalamanan og tulo ka assists samtang si Berame midugang og 14 puntos ug upat ka rebounds alang sa ARQ Builders.

Ang way pagbahar nga si Jojo Tangkay mikuha sab og atensiyon human mibubo og 13 sa iyang 16 puntos sa ikaduhang kuwarter hinungdan nga ang ARQ nakatabla sa halftime, 45-45. Milangkat sab siya og upat ka rebounds ug lima ka assists.

Ang duha ka kanhi CESAFI MVP nga sila si Jaybie Mantilla ug Shaq Imperial nagkumbinar og 17 puntos samtang sila si Rendell Senining, Fletcher Galvez ug John Abad nagkumbinar og 22 puntos sa balanseng ataki sa ARQ.

Si Paul Galinato maoy nangu sa Fighter Fifty uban ang 18 puntos ug gisundan kini ni Elmer Echavez nga dunay 17 puntos. Sila si Eliud Poligrates ug Nat Cruz mihipos og 11 puntos matag usa samtang si Alfe Amarante mitali og 10 puntos sa pilderong kawsa.

Sa laing duwa, si Enrico Llanto mikadlit og 18 puntos ug walo ka rebounds aron pangulohan ang Deon Motors ngadto sa 74-68 nga pagpakaging sa Truck N' Trail Transport Services.

Si Llanto nakakuha og igong suporta nilang Kenny Rogers Rocacurva ug Luigi Gabisan nga parehong mipupo og 11 puntos.