Celtics nanoktok sa NBA Finals

CEBU, Philippines — Sila si Jaylen Brown ug Jayson Tatum nagkumboya'g 47 puntos sa dihang gipabugnaw nab sab sa Boston Celtics ang Miami Heat, 93-80, sa Game 5 sa ilang best-of-seven NBA Eastern Conference Finals kagahapon didto FTX Arena sa Miami, Florida.

Bitbit ang 3-2 nga bentaha sa serye, ang Celtics nanginahanglan og usa na lang ka daog aron hingpit nang mo-abante sa NBA Finals sa labing unang higayon sukad niadtong 2010 sa dihang gipilde sila sa Los Angeles Lakers.

Ang Celtics wala na makasakmit pa og korona sa NBA sukad niadtong 2008 diin ilang gibuntog ang Lakers luyo sa trianggulo nilang Kevin Garnett, Paul Pierce, ug Antoine Walker.

Ang Celtics nahagba sa nag-unang duha ka duwa apan nakasagunson og tulo ka daog batok sa Heat ninungdan sa ilang pagpanoktok sa pultahan sa NBA Finals.

Dako sab og naambag si Al Horford sa habig sa Celtics bitbit ang 16 puntos, pito ka rebounds ug lima ka assists.

Ubos sa pagmangtas nilang Brown ug Tatum, ang Celtics migamit og makalisang nga 24-2 run sa tunga-tungang bahin sa ikatulo ug ikaupat nga kuwarter aron patikalbongon ang Heat.

Abante nang daan og 11 puntos, 69-58, misamot pa og kabangis ang Celtics nga miabli sa katapusang kuwarter pinaagi sa nagbagang 14-2 aron inaton ang ilang labaw ngadto na sa 23 puntos,

83-60, nga nakaparabag sa Heat sa nahibiling bahin sa duwa.

Si Bam Adebayo mipupo og 18 puntos ug 10 ka rebounds alang sa Heat, nga mipasud lamang og 30 sa 94 nila ka itsa hinungdan sa ilang pagkahisukamod.