AEG namawi, gipahimungtan ang Punisher

CEBU, Philippines — Ang Team AEG dali nga nakabawi sa makapakurat nilang kapildihan sa Cougars ug gipahimungtan sa ilang kayugot ang Punisher, 79-70, sa Hoops Arlon Cup Season 1 niadtong weekend didto sa City Sports Club-Cebu gym.

Si Justin Aspacio milansang og unom sa tres sa iyang 18 puntos sa dihang gikulit sa AEG ang ikalima nilang daog batok sa nag-inusarang pilde.

Sa laing bahin, ang Prayboys, Gonzalodo Entreprises ug Trojan Warriors miinat tanan sa ilang records ngadto sa 4-2. Si Kenny Genobia mitagak og 20 puntos sa dihang gipaksit sa Prayboys ang RKC, 65-59, samtang si Matthew Grafilo mibugha og 16 puntos, tulo ka rebounds, ug upat ka assists aron pangulohan ang Gonzalodo Enterprises ngadto sa 74-69 nga pagpakaging sa Manumen. Wala sab magpabitin si Ronn Ong nga miposa og upat ka 3-pointers sa iyang 14 puntos sa dihang ang Trojan Warriors nakaipsot batok sa Broncos, 81-79. Sa uban pang mga resulta, si Jherjacz Romeo Jaca mitimbre og 25 puntos sa dihang gipahilom sa 5 Joints ang Wolves, 74-71, si Miles Tongco mitali og 23 puntos uban ang tulo ka rebounds ug tulo ka assists sa dihang gipayaka sa Dextructures ang Clutch City, 78-72, samtang si Rholex Sampan mirehistro og solidong double-double nga 14 puntos ug 15 ka rebounds uban ang tulo ka assists sa dihang giwani sa Tera ang Cougars, 67-63.

Ang tulo ka bulan nga torneyo giorganisa ni Adrian Dy, nga maoy nagtukod sa Hoop Nation niadtong 2015.