CEBU, Philippines — Ang Ironman 70.3 Philippines mobalik sa Sugbu sa unang higayon sukad sa pag-ulbo sa kalibuntahong pandemiya kapin sa duha ka tuig na ang milabay sa maanindot nga paagi tungod sa bag-o niining rota sa bike stage nga mag-agi sa labing taas nga taytayan sa Pilipinas.
Kapin sa 1,500 ka triathletes gikan sa nagkadaiyang dapit sa kalibutan ang mopakita'g aksiyon sa karera karong Agosto 7 didto sa Mactan nga seguradong atngan sa kadaghanan gumikan kay mopasundayag kini sa labing bag-o ug makadani nga struktura sa nasud.
Apil sa rota sa 90.1 ka kilometro nga bike leg ang Cebu-Cordova Link Expressway (CCLEX), ang modernong dalan sa Metro Cebu nga nagkonektar sa dakbayan sa Sugbo ug sa lungsod sa Cordova.
Duna kini gilay-on nga 8.9 ka kilometro ug giisip nga usa ka iconic landmark dinhi sa Visayas. Mao sab kini ang unang higayon nga ang CCLEX gamiton nga rota sa usa ka sports event sukad kini nagsugod og operasyon niadtong Abril 30. Sa miaging mga edisyon sa Ironman 70.3 dinh sa Sugbo, ang Marcelo Fernan Bridge mao kanunay ang gamiton sa bike stage.
“What makes the Ironman 70.3 doubly exciting is that the new bike route will provide a new experience not just for the triathletes but for the Cebuanos and local and foreign tourists as well, the CCLEX being one of the newest attractions in the Visayas region,” matud pa ni Fred Uytengsu nga brand ambassador sa Ironman.
Alang ni Princess Galura, ang general manager sa Sunrise Events Inc. nga maoy race organizer sa Ironman 70.3 Philippines, ang bag-ong rota tataw nga makahatag og dugang hagit ug kahinam sa mga partisipante.
“We are constantly seeking new ways to challenge our triathletes as we continue to provide them an exceptional racing experience this year. With CCLEX as one of the highlights for this year’s race, there is even more for us to celebrate as we welcome the return of Ironman 70.3 Philippines,” dason pa ni Galura.
Alang sa dugang detalye ug rehistrasyon, karong mga interesdo mahimong mobisita sa https://www.ironman.com/im703-cebu-philippines.