CEBU, Philippines — Ang tanang siyam ka Pinoy'ng boksidor segurado nang makasakmit og medalya sa 31st Southeast Asian (SEA) Games didto sa Bac Ninh province sa Vietnam.
Kini human sila mi-abante sa semifinal round sa tagsa-tagsa nila ka dibisyon.
Segurado na og bronze medal sila si Josie Gabuco, Rogen Ladon, James Palicte, Eumir Felix Marcial, Riza Pasuit, Nesthy Petecio, Ian Clark Bautista, Marjon Pianar, ug Irish Magno.
Kon molampus sila sa semis, motikang sila sa gold medal round karong Dominggo.
Sa kinatibuk-an, 10 gyud unta ang entrante sa Pilipinas sa SEAG boxing event.
Apan si Hergie Bacyadan, nga bag-ohay pang naka-gold sa Thailand Open, dili makapakita'g aksiyon kay gikansela man ang women’s middleweight class (75 kg.) gumikan kay duha lamang sila ka parisipante sa ilang kategoriya.
Si ABAP president Ed Picson mipahimangno sa mga pambato sa nasud nga dili mokompiyansa gumikan kay naglungot-lungot man ang ilang mga karinal nga palayason sila sa ilang trono.
Ang Team Phl maoy defending champion human gidominar ang SEAG boxing sa miaging edisyon sa torneyo niadtong 2019 diin ang nasud maoy host.