Mas dako nga PSL U21 tourney karong Hunyo

CEBU, Philippines — Nadasig sa naglagiting nga kalamposan sa ilang Aspirants Division, ang Pilipinas Super League (PSL) nangandam sa mas dako ug mas nindot nga Under 21 tournament sunod bulan.

"Malampuson kaayo ang una natong Under 21 tournament. Daghan ta'g natabangan nga mga players ilabi na sa paghatag kanila og platform aron mapakita ang ilang abilidad ug aron sila mailhan," matud pa ni PSL U21 program director Chelito "Chakang" Caro.

"Nindot kaayo ni nga programa mao nang amo gyud ning ipadayon. In fact, padak-on ug panindoton pa namo ang umaabot namong liga this June," dugang pa ni Caro nga mao sab ang deputy commissioner sa PSL pro division.

Lahi sa Invitational Cup, si Caro nagkanayon nga mopahigayon sila og managlahi nga legs sa Luzon, Visayas, ug Mindanao teams padung ngadto sa national championship sa ikaduha nilang komperensiya nga tentatibong gikatakda nga sugdan karong Hunyo 18.

Upat na ka teams ang mipadayag sa ilang interes nga mopakita'g aksiyon sa Visayas leg nga gipangulohan sa Consolacion Sarok Weavers, nga maoy nakampiyon sa labing unang PSL Under 21 Aspirants Division Invitational Cup sa miaging bulan didto sa Roxas, Zamboanga del Norte.

Ang uban mao ang ARQ Builders Lapu-Lapu City Chiefs, Sherilin-Mandaue City, ug LGU San Fernando.

Si Caro mibutyag nga nakig-estorya na sab sila uban sa Talisay City ug Bohol Province aron moapil sa PSL.

"If maabot ta og unom ka teams, dinhi nato duwaon sa Cebu ang Visayas leg," dason pa ni Caro. "The Visayas champion will then face the champions in Mindanao and Luzon sa atong national finals."

Show comments