CEBU, Philippines — Gipangtagak sa defending champion Milwaukee Bucks ug Golden State Warriors ang tagsa-tagsa nila ka mga karibal sa parehong baraha nga 4-1 aron pag-abante ngadto sa ikaduhang hugna sa NBA playoffs.
Didto sa Milwaukee, si Giannis Antetokounmpo mipabuto og 33 puntos sa dihang hingpit nga gipatikangkang sa Bucks ang Chicago Bulls, 116-100, aron pagmartsa niini ngadto sa Eastern Conference semifinals diin ilang sangkaon ang Boston Celtics, nga bag-ohay pang mi-sweep sa Brooklyn Nets.
Dominante kaayo si Antetokounmpo nga mipasud og 11 sa 15 niya ka mga itsa nga gikahimuot og maayo sa bagang panon sa ilang mga fans didto sa FiServ Forum.
Dako sab og natampo si Pat Connaughton nga mitali og 20 puntos ug ingon man si Bobby Portis nga mihipos og 14 puntos ug 17 ka rebounds alang sa Bucks.
Sa laing aksiyon didto sa Chase Center sa San Francisco, ang Warriors nagsandig sa 30 puntos gikan ni Stephen Curry ug krusyal nga 15 puntos ni Gary Payton II aron silyohan ang 102-98 nilang pagpalagpot sa Denver Nuggets.
Ang Warriors sud na sa West semis diin ilang harongon ang modaog sa serye tali sa Memphis Grizzlies ug Minnesota Timberwolves.
Ubos sa pagpangu ni Nikola Jokic nga mipatuasik og 30 puntos, ang Nuggets naglabaw unta og otso puntos human sa tulo ka kuwarter apan ang Warriors milampaso sa ilang bisita sa pinal nga 12 minutos sa aksiyon, 32-20, aron tuldokan ang ilang serye sud sa lima lamang ka duwa.