Suns nakaipsot sa Rockets

CEBU, Philippines — Si Devin Booker mikolekta og 24 puntos, walo ka assists ug tulo ka rebounds aron tabangan ang Phoenix Suns nga makaipsot batok sa Houston Rockets,  124-121, sa NBA kagahapon didto sa Footprint Center sa Phoenix, Arizona.

Midugang si Deandre Ayton og 23 puntos ug siyam ka rebounds samtang si Mikal Bridges miamot og 17 puntos ug pito ka rebounds alang sa Suns nga miposte sa ikapito nilang sagunson nga daog ug ika-11 sa kinatibuk-an sa miagi nilang 12 ka duwa.

Nagparamdam sab si Cam Johnson uban ang 14 puntos, lima ka rebounds ug upat ka assists ug ingon man si Chris Paul nga mitali og 11 puntos alang sa Suns nga nagbitbit na karon og 48-10 record nga maoy labing  nindot ning NBA season.

Didto sa Boston, si Jerami Grant mipasud sa iyang itsa sa pinal nga 19.1 segundos aton aswaton ang Detroit Pistons sa makapakugang nga kadaogan batok sa Boston Celtics, 112-111.

Si Grant mikadlit og 24 puntos alang sa Pistons nga miputol sa walo nila ka sagunson nga pilde ug mipakgang sa siyam ka sunod-sunod ka daog sa Celtics.

Duna pa untay tsansa ang Celtics nga inaton ang mainit nilang ratsada apan nangasipyat ang mga tira nilang Jaylen Brown ug Jayson Tatum.

Gawas ni Grant, si Cade Cunningham misalida sab uban ang 20 puntos alang sa Pistons nga nakadaog sa unang higayon sukad niadtong Enero 30.

Dako sab og naambag si Saddiq Bey nga dunay 20 puntos ug 11 ka rebounds ug ingon man si Kelly Olynyk nga mitampo og 15 puntos alang sa Pistons.

Si Brown maoy nangu sa Boston bitbit ang 31 puntos. Si Al Horford mipupo og 19 puntos, pito ka rebounds, ug pito sab ka assists sa pilderong Celtics.