NBA all-star voting: Curry, LeBron, Durant nag-una gihapon
CEBU, Philippines — Sila si Stephen Curry, LeBron James, ug Kevin Durant nag-una gihapon sa listahan sa dunay labing daghang boto gikan sa mga fans human sa ikaduhang hugna sa botasyon alang sa giatngan nga NBA All-Star Game.
Ang alas sa Golden State Warriors nga si Curry nagbarog sa unang puwesto uban ang 4,463,426 ka mga boto.
Nagsunod kaniya si James, ang bitoon sa LA Lakers nga mikabkab og 4,386,392 ka boto.
Samtang si Durant sa Brooklyn Nets nahimutang sa ikatulong dapit bitbit ang 4,088,334 ka boto.
Gipaabot nga sila maoy mangu sa tagsa-tagsa nila ka mga koponan sa 71st NBA All-Star Game karong Pebrero 20 didto sa Cleveland.
Gawas nilang Curry ug James, lain pang mga bitoon sa Western Conference nga mosalida sa tinuig nga pasundayag sa liga mao sila si Ja Morant sa Memphis Grizzlies, Luka Doncic sa Dallas Mavericks, Nikola Jokic sa Denver Nuggets, Andrew Wiggins sa Warriors, ug Paul George sa LA Clippers.
Sa East, angayan nga atngan isip kauban ni Durant sila si Giannis Antetokounmpo sa Milwaukee Bucks, Joel Embiid sa Philadelphia 76ers, DeMar DeRozan sa Chicago Bulls, Trae Young sa Atlanta Hawks, ug James Harden sa Nets.
- Latest