Pagbalik ni Thompson sa NBA mabungahon

CEBU, Philippines — Si Klay Thompson mi-iskor og 17 puntos sa malamuson niyang pagbalik gikan sa duha ka makapahugno nga injury nga nakapahuway kaniya og kapin sa duha ka tuig ug tunga aron tabangan ang Golden State Warriors sa 96-82 niining demolisyon sa Cleveland Cavaliers sa NBA kagahapon didto sa Chase Center  sa San Francisco, California.

Ang five-time All-Star mipasud og pito sa 18 niya ka itsa apil na niini ang tulo sa gitira niyang walo ka 3-pointers. Mihipos sab siya og tulo ka rebounds, usa ka assist ug usa ka steal sud sa 20 minutos niyang pagtikaw-tikaw sa korte diin siya gi-abihan og maayo sa bagang panon sa ilang fans nga klaro kaayong gimingaw kaniya ug nalipay sa pagbalik niya og duwa.

"I was just happy to be out there doing what I love again. Getting my rhythm back, it feels really good," buhagay pa ni Thompson."The ovation to start the game, I just am so grateful for these fans. It was special. I'm never going to forget this night," dugang pa niya.

Sa kinatibuk-an, si Thompson nakapalta og 941 ka adlaw. Wala na siya makaduwa sukad nayayay ang iyang tuhod atol sa Game 6 sa 2019 NBA Finals batok sa Toronto Raptors. Mobalik na unta siya og duwa apan nadiskaril kini human siya na-angol og usab atol sa usa ka pick-up game niadtong Nobiembre 2020.

Nagmabungahon ug mabulokon hinoon ang pagbalik ni Thompson sa NBA diin siya mikab-ot og ka duha ka dungog human mikadlit sa ika-12,000 niyang puntos ug milansang sa ika-1,800 nga 3-pointer sa iyang karera.

Ang "Splash Brother" ni Thompson nga si Stephen Curry misalida sab uban ang 29 puntos, lima ka rebounds ug lima ka assists samtang si Jordan Poole midugang og 14 puntos alang sa Warriors nga misanta sa duha ka sagunson nilang pilde aron makigsawo sa Phoenix Suns sa liderato sa NBA bitbit ang parehong 30-9 nga baraha.

“It was just amazing having him out there,” matud pa ni Curry nga gibati og tumang kalipay sa pagbalik ni Thompson, nga bugnaw man tuod og sinugdanan apan mipakita gihapon sa kahait nga naghatud kaniya og tulo ka kampiyonato uban sa Warriors gikan niadtong 2015 ngadto sa 2018 NBA seasons.