ARQ boxers mas nadasig

CEBU, Philippines — Ang mga miyembro sa ARQ Boxing naka-angkon og dugang inspirasyon nga mohimo og pangan sa ilang kaugalingon ug kab-oton ang ilang mga damgo sa kinabuhi sa umaabot.

Kini human sila nagabaton og bag-ong panimalay, usa ka maanindot nga pasilidad sa ilang training ug ingon man puy-anan nga espesyal gipatukod alang kanila sa ilang big boss nga si Jason Arquisola.

Tungod ning mas dako, mas hamugaway ug kumpleto sa ekipo nga gym nga anaa mahimutang sa Barangay Tigbao, Talamban, dakbayan sa Sugbu, ang mga batos sa ARQ wala nay lain pa nga ikapangayo.

“Dako gyud kaayo mi og pasalamat sa among big boss nga si sir Jason Arquisola kay gibuhatan mi og bag-ong gym. Hamugaway kaayo ug mura na gani mi og mauwaw kay gikumpletohan mi sa tanan namong mga panginahanglan,” matud pa ni OPBF Silver flyweight champion April Jay “Astroboy” Abne.

“Grabi kaayo ang suporta nga gihatag sa amoa bisan og naa ta ron sa pandemiya mao nang maka-ingon ko nga suwerti kaayo mi,” paambit pa ni light flyweight contender John Paul Gabunilas.

Sa iyang bahin, si ARQ chief trainer Eldo Apawan Cortes mipasalig nga ang tanan nilang mahimo aron masuklian ang gasa nga gibubo kanila mao ang pagdoble sa ilang paningkamot aron ilang mabuhat ang gipangagpas kanila ugma damlag.

“Sobra-sobra kaayo ang suporta ngari namo labi na sa mga boxers,” kanayon pa ni Cortes. “Wala mi laing ikabalos kondili ang paghatag ra gyud og dungog sa ARQ Boxing ug among paninguhaon nga ma-abot namo ang amo pangandoy.”