Lebron Gisilotan na SAB
CEBU, Philippines — Bag-ohay pa lang nasuspenso, lain na sab nga silot ang nahiaguman ni LA Lakers superstar LeBron James.
Kini human ang NBA mipahamtang og $15,000 (P750,000) nga multa batok ni James gumikan sa 'obscene gesture' kon dili makiangayon niining binuhatan sud sa korte duha ka adlaw pa lamang ang milabay.
"LeBron James has been fined $15,000 for making an obscene gesture on the playing court and warned for using profane language during media availability," matud pa sa tigpamaba sa liga nga si Byron Spruell.
Mao kini ang ikaduhang higayon sud ning semanaha nga gidisiplina sa NBA ang four-time NBA champion.
Si James nasuspenso og usa ka duwa human sa dugoon nilang panagbangi ni Isaiah Stewart sa Detroit Pistons sa ilang duwa niadtong Lunes. Mao kadto ang labing unang higayon nga si James nasuspenso sa iyang karera.
Gumikan niini, si James wala makaduwa sa dihang ang Lakers gipakaging sa New York Knicks, 106-100, niadtong Miyerkules didto sa Madison Square Garden.
Namawi hinoon dayon si James sa iyang pagbalik diin siya mipaulbo og 39 puntos sa 124-116 nilang kadaogan batok sa Indianapolis Pacers niadtong Huybes.
- Latest