AICC Manila mihimo'g kasaysayan
CEBU, Philippines — Ang AICC Manila misuwat og kasaysayan isip labing unang kampiyon sa FilBasket.
Kini human gipatikangkang sa Manila ang San Juan-Go for Gold, 72-68, sa tinagakay nga duwa sa ilang best-of-three finals aron dominahon ang FilBasket Subic Championship niadtong Martes sa gabii didto sa Subic Gym.
Gihuman sa Manila ang serye sa baraha nga 2-1.
Si Ronjay Buenafe milansang og duha ka krusyal nga free throws sa hilimatyong segundos nga nahibilin sa duwa aron tuldokan ang kulbahinam nga daog sa Manila.
Kalit nga midayb ang Manila human mi-abante og 13 puntos sa ikatulong kuwarter hinungdan nga nakasikit ang San Juan ngadto na lang sa dos puntos, 68-70, apan si Buenafe kalmadong mipasud sa iyang free throws aron pagsalbar sa iyang koponan.
Si Michael Mabulac maoy nangu sa Manila uban ang 18 puntos, walo ka rebounds ug tulo ka steals samtang si Chris Bitoon midonar og 13 puntos ug unom ka rebounds.
Apan si Hesed Gabo nga dunay 10 puntos, tulo ka rebounds ug unom ka assists sa Game 3 maoy gibayaw nga Finals MVP.
- Latest