Marcial, Paalam naglaraw luna sa gold-medal round

CEBU, Philippines — Gisaytan sa mga Pinoy'ng boksingero nga sila si Eumir Felix Marcial ug Carlo Paalam ang luna sa gold-medal round sa dihang ilang sangkaon ang managlahing kontra sa semifinals sa tagsa-tagsa nila ka dibisyon sa 2020 Tokyo Olympics boxing event karong adlawa didto sa Kokugikan Arena sa Tokyo, Japan.

Gigarantiyahan ni Marcial ang Team Philippines og bronze medal human sa impresibo niining pagpalukapa ni Arman Darchinyan sa Armenia sud lamang sa usa ka hugna. Mao sab ang gibuhat ni Paalam human sa makapakurat niining pagtagak ni Olympic ug world champion Shakhobidin Zoirov sa Uzbekistan pinaagi sa split technical decision niadtong Martes.

Si Paalam, lumad gikan sa Cagayan de Oro City, maoy unang mokatkat sa ring aron harongon ang pambato sa Japan nga si Ryokei Tanaka sa men's flyweight semis sa ala 1:30 sa hapon.

Gawas nga buhion ang iyang kampanya nga makamina og bulawan, si Paalam mosuway sab pagbawos sa mapait nga kapildihan nga nadangatan sa iyang kababayan nga si Nesthy Petecio, nga gibuntog pinaagi sa kobtrobersiyal nga desisyon sa Hapon niining karibal nga si Sena Irie nga naghikaw sa Pilipinas sa gihandum niining labing unang boxing gold sa Olympics.

Sama ni Paalam, ang garbo sa Zamboanga City nga si Marcial buot sab nga mopahayag sa iyang tsansa nga mosakmit sa makasaysayanong gold sa dihang iyang harongon si  2017 world champion Oleksandr Khyzhniak sa Ukraine sa men's middleweight finals karong alas 2:03 sa hapon.

Sila si Paalam ug Marcial parehong determinado nga motunol sa Pilipinas sa labing una niining boxing gold sa Olympics.

Sukad ang nasud unang misamot sa prestihiyosong torneyo nga mahitabo kausa lamang sud sa upat ka tuig niadtong 1924 didto sa Paris, tulo pa lamang ka silver ang na-ani niini, ang labing uwahi gihatag ni Petecio duha ka adlaw pa lamang ang milabay. Unang nakab-ot ang maong dungog ni Anthony Villanueva niadtong 1964 Tokyo Games ug gisundan kini ni Mansueto "Onyok" Velasco niadtong 1996 Atlanta Olympics.