Petecio napakyas sa misyon

Silver ang nabira sa Olympics boxing;Paalam abante sa semis

CEBU, Philippines — Nahisukamod si Nesthy Petecio sa iyang kampanya nga langkaton ang labing unang boxing gold sa Pilipinas sa Olympics human siya gibuntog sa Hapon niyang karibal nga si Sena Irie pinaagi sa unanimous decision, 5-0, sa women's featherweight finals sa 2020 Tokyo Olympics kagahapon didto sa Kokugikan Arena sa Japan.

Gawas nga mibulsa sa bulawang medalya, ang 20-anyos nga si Irie nagbitbit na sab karon og 3-1 nga bentaha batok ni Petecio sa ilang head-to-head record sud sa upat nila ka sangka sa miaging duha ka tuig.

 Taliwala sa iyang kapakyasan, ang garbo sa Santa Cruz, Davao del Sur nga si Petecio mihimo gihapon og kasaysayan isip labing unang Pinay'ng boksingero nga nakamedalya sa Olympics.

Bitbit ang silver, iyang gitabla ang nakab-ot sa mga kababayan niyang sila si Anthony Villanueva ug Mansueto "Onyok" Velasco niadtong 1964 Tokyo ug 1996 Atlanta Olympics.

Sa pagkapukan ni Petecio, ang laraw sa nasud nga maka-gold sa boxing anaa na sa mga kamot nilang flyweight Carlo Paalam ug middleweight Eumir Felix Marcial.

Si Paalam mikadlit og usa ka makapakurat nga kadaogan human iyang gitagak si reigning Olympicug world champion Shakhobidin Zoirov sa Uzbekistan pinaagi sa split technical decision, 4-0, aron pagmartsa ngadto sa men's flyweight semifinals.

Labaw si Paalam sa scorecards sa upat ka judges sa dihang gihunong ang away sa oras nga 1:16 sa ikaduhang hugna human ang garbo sa Carmen, Cagayan de Oro nakahiagum og gisi sa iyang agtang gumikan sa headbutt.

Gumikan niini, garantisado na si Paalam og bronze nga maoy ikatulong medalya sa Team Phl sa boxing sunod sa silver ni Petecio ug seguradong bronze ni Marcial.

Sa kinatibuk-an didto sa Tokyo Games,  ang Team Phl duna nay upat ka medalya apil ang makasaysayanong gold ni Hidilyn Diaz sa weightlifting aron buk-on ang 89 ka tuig niining record nga tulo ka bronze niadtong 1932  Los Angeles Olympics.