Montejo misidlak sa CEPCA weekly
CEBU, Philippines — Si Norman Jasper Montejo maoy nanghawod sa Coleto Itaas Blitz Series #1, ang labing uwahing edisyon sa senemanang online tournament sa Cebu Executives and Professionals Chess Association (CEPCA).
Ang 37-anyos nga si Montejo, lumad gikan sa Catbalogan City, Samar, mihuman sa 11 ka hugna nga kompetisyon bitbit ang labing taas nga 10.5 puntos aron sakmiton ang titulo sa all-Cepcans category.
Si Montejo, kanhi varsity player sa St. Mary's College-Catbalogan, kasamtangan nagtrabaho isip estate supervisor sa National Housing Authority (NHA) didto sa Eastern Visayas.
Si Nicanor Cuizon mipahiluna sa ikaduhang dapit uban ang 8.5 puntos samtang si Jimmy Ty, Jr. nalandig sa ikatulong puwesto uban ang 7.5 puntos. Naglangkob sa top 6 mao sila si International Arbiter Linky Yap, Rosendo Yamyamin, ug National Master Rogelio Enriquez, Jr.
Sa Cepcans B/Ladies division, si Sheila Khan Sepanton maoy midominar human mitali og 40 puntos. Ang 29-anyos nga si Sepanton Board 1 player sa Central Philippines University sa Iloilo sa dihang nagtungha pa siya sa kolehiyo.
Sila si Kristina Belano ug Reynaldo Flores maoy mi-okupar sa nagsunod nga duha ka luna uban ang 36 ug 33 puntos. Naapil sa top 5 mao sila si Dr. Leo Lofranco ug Nicanor Cuizon. Ang kaluhang torneyo nahimong posible tungod sa suporta ni US-based Cepcan Woman NM Susan Itaas.
- Latest
