Dagami Warriors nahagba sa South finals
CEBU, Philippines — Napakyas ang Cordova Dagami Warriors sa ilang kampanya pagsakmit og titulo human sila gipayaka sa Iloilo Kisela Knights sa Southern Division finals sa Professional Chess Asscociation of the Philippines (PCAP) GM Wesley So Cup niadtong Sabado sa gabii. Ang Dagami Warriors, nga gilangkoban nilang Israeli Grandmaster Nitzan Steinberg, National Masters Merben Roque ug Mario Mangubat, ug Woman International Master Bernadette Galas, napilde sa unang duwa, 8-13, sa wapa pa hingpit nga gipatikangkang sa Kisela Knights pinaagi sa 5.5-15.5 nga desisyon sa ikaduha nilang sangka.
Mapasigarbuhon hinoon gihapon kaayo ang Dagami Warriors sa ilang nakab-ot ilabi na kay wala man gani sila makasud sa playoffs sa miaging All Filipino Conference.
Human gilangkat ang korona sa South, ang Kisela Knights makigharong sunod sa North champion San Juan Predators sa Grand Finals karong Miyerkules, Agosto 4. Ang Predators mi-abante human gipalagpot ang Laguna Heroes sa iskor nga 12-9 ug 13.5-7.5
Ang Iloilo gipangulohan nilang GMs Joey Antonio ug Hovhannes Gabuzyan sa Armenia, National Masters Fritz Bryan Porras, John Michael Silvederio, Cesar Mariano, ug Giovanni Mejia, ug Candidate FIDE Master Cherry Ann Mejia. Samtang ang San Juan gibitoonan nilang GM Oliver Barbosa, IM Ricky de Guzman, Woman IM Jan Jodilyn Fronda, NM Michael Gotel, ug Arena GM Gavin Lloyd Ong.
- Latest