CEBU, Philippines — Padayon nga midagsa ang mga bitoon didto sa Wild Card Gym sa Hollywood aron lamang makasaksi ni eight-division world boxing champion Sen. Manny Pacquiao sa iyang training.
Ang labing uwahing personalidad nga mibisita ni Pacquiao mao si NBA star Karl-Anthony Towns sa Minnesota Timberwolves.
Mismo si Towns ang mipa-ambit sa ilang panagkita ni Pacquiao pinaagi sa pag-post og mga hulagway sa iyang Twitter diin iyang gitawag si Pacquiao nga usa ka 'legend'.
Sa mga hulagway, makita si Towns nga mihatag sa iyang jersey ni Pacquiao ug ingon man miposing uban ang WBA welterweight championship belt sa Pinoy'ng boksingero.
Niadto lamang miaging semana, ang mga kababayan ni Pacquiao nga sila si Utah Jazz guard Jordan Clarkson ug rapper Apl.de.Ap sa Black Eye Peas nakighimamat sab kaniya.
Ang 42-anyos nga si Pacquiao hugtanon karong nangandam alang sa umaabot nikang engkuwentro ni WBC/IBF welterweight champion Errol Spence karong Agosto 22 (oras dinhi sa Pilipinas) didto sa T-Mobile Arena sa Las Vegas.