CEBU, Philippines — Gipukan ni Eumir Marcial si Younes Nemouchi sa Algeria pinaagi sa Referee Stopped Contest due to Injury (RSC-I) sa nahibiling 19 segundos sa unang hugna aron pagmartsa ngadto sa men's middleweight quarterfinals sa 2020 Tokyo Olympics boxing event didto sa Kokugikan Arena kagahapon.
Gikan sa sinugdanan, kontrolado kaayo ni Marcial ang away. Mipatupa siya og solidong tuong suntok nga nakapaluhod ni Nemouchi sa sayong bahin sa ilang engkuwentro.
Sa oras nga 1:10, gipa-check ni reperi Radoslav Simon si Nemouchi nga nagkadugo human nakahiagum og gamay nga gisi sa ibabaw nga bahin sa ibabaw nga bahin sa tuo niining mata.
Nakapadayon pa og kumbati si Nemouchi apan wa magdugay giundang sa reperi ang away sa nahibling 19 segundos kay dili na makatiwas pa ang Algerian gumikan sa injury niini.
“Masaya po ako siyempre sa pagkapanalo. Hindi pa ito ‘yung last fight, marami pang fights na darating. Kasama ‘yung mga coaches ko, paghahandaan pa po namin ‘yung mga susunod na laban,” matud pa ni Marcial, nga makigharong sunod ni Armenian pro Arman Darchinyan karong Dominggo alang sa luna sa semifinals.
Wa hinooy suwerti ang kababayan ni Marcial nga si Irish Magno human kini gipalagpot ni Thai pro Jutamas Jitpong pinaagi sa unanimous decision sa women's flyweight Round of 16.
Gumikan sa kapakyasan ni Magno, tulo na lang ka Pinoy'ng mga boksidor ang nahibilin. Gawas ni Marcial, buhi pa ang paglaum nilang Nesthy Petecio ug Carlo Paalam nga makatunol og gold medal sa Pilipinas ning prestigoyong torneyo nga mahitabo kausa lamang sud sa upat ka tuig.